COVID-19 kezinde nárestege kútim jasaý tártibi qandaı
«Bizdiń jáne basqa da respýblıkalyq ortalyqtardyń mamandary COVID-19 indetin juqtyrǵan analardyń nárestelerine kútim jasaýdyń algorıtmin daıyndady. Osyndaı nárestelerge medıtsınalyq kómek atalǵan algorıtmge sáıkes júrgiziledi. Barlyq óńirler algortımge súıenip, tıisti qadamdardy jasaıdy. Onda ınfektsııa juqtyrǵan analardy bosandyryp alý, jańa týǵan náresteni oqshaýlaý, balaǵa kútim jasaý tártibi qamtylǵan», - dep túsindirdi pedıatr dáriger.
Sonymen qatar R. Boranbaeva koronavırýsqa shaldyqqan júkti áıelderge arnalǵan perzenthanalar týraly aıtyp berdi.
«Júkti áıelde koronavırýs ınfektsııasy anyqtalsa, onda ol jalpy perzenthanada bosanbaıdy. Sáıkesinshe, ol indet juqtyrǵan áıelderge arnalǵan perzenthanaǵa jetkiziledi. Náresteni alý úshin birden neonatologtar brıgadasy daıyndalady, ıaǵnı olar balany oqshaýlanǵan basqa bólmede kútip turady. Náreste ómirge kelgennen keıin, ony dárigerlerdiń osy brıgadasyna tapsyrady. Neonatologtar balanyń densaýlyq jaǵdaıyn baǵalap, anasynan bólek shyǵarady. Sebebi náreste anasynan ınfektsııany juqtyrǵanyn nemese juqtyrmaǵanyn bilmeımiz. Baladan koronavırýs ınfektsııasyna analız alynady. Osy oraıda balanyń ınfektsııaǵa qatysty jaǵdaıy anyqtalǵansha, ony bólek ustaımyz. Eger balada ınfektsııa naqtylansa, al anasynyń jaǵdaıy qanaǵattanarlyq deńgeıde bolsa jáne koronavırýs sımptomsyz ótip jatsa, onda balany anasyna tapsyramyz. Óıtkeni, balany bólekteýdiń negizi joq, ekeýinde de ınfektsııa bar», - dedi dáriger.
Onyń sózine qaraǵanda, koronavırýs balaǵa vertıkaldy jolmen juqpaıdy, anasynan qursaqtaǵy balaǵa indet taralmaıdy.
«Negizinen náreste ınfektsııany bosaný joldarynan ótken kezde juqtyrady. Sondyqtan anasy men balasynda indet anyqtalsa, olar bir-birinen ajyratylmaıdy. Eger de nárestede ınfektsııa bolmasa, onda ony ýaqytsha basqa palataǵa oqshaýlaımyz. Sebebi balany emizgen kezde indetti juqtyrý qaýpi bolady. Osydan keıin anasy men balanyń jaǵdaıy jaqsy bolsa, olardy perzenthanadan shyǵarý múmkindigi qarastyrylady», - dep naqtylady ol.
Balalardyń 20 paıyzy indetti ortasha aýyr jáne aýyr formada eńseredi
Atap aıtqanda, balalar men nárestelerde koronavırýs ınfektsııasy negizinen sımptomsyz nemese jeńil formada ótedi. ıAǵnı, bul balalardyń 80 paıyzǵa jýyǵy aýrýdy sımptomsyz ári jeńil formada eńseretinin bildiredi.
«Balalardyń 20 paıyzynda indet ortasha aýyr jáne aýyr formada ótedi. Olar kóbine sozylmaly ári qosalqy aýrýlary barlar. Osy sozylmaly aýrýlar ınfektsııa kezinde jaǵdaıdy qıyndatyp, asqyndyryp jiberedi», - dedi Rıza Boranbaeva.
Dárigerdiń atap ótýinshe, jańa týǵan náresteniń ımmýnıtetin kóterý anasyna baılanysty. Deni saý bala ómirge kelýi úshin anasynyń densaýlyǵy jaqsy bolýy kerek.
«Negizinen, barlyǵy anasyna baılanysty. Árıne, júktilik kezinde áıeldiń koronavırýs ınfektsııasymen aýyrǵany kóńil kónshitpeıdi. Eń bastysy – aqýyzǵa, dárýmenderge baı úılestirilgen taǵamdar bolýy kerek, sondaı-aq medıtsınalyq baqylaý ýaqtyly jasalǵan jón. Bul turǵyda balanyń densaýlyǵyna qatysty jaǵdaı turaqty baqylaýda bolady», - dedi medıtsına ǵylymdarynyń doktory.