COVID-19: Elimizdegi modýldik aýrýhanalar qalaı jumys istep tur
2020 jyldyń naýryzynda Dúnıejúzilik densaýlyq saqtaý uıymy koronavırýstyq ınfektsııa pandemııasyn jarııalady. QR Úkimeti Densaýlyq saqtaý júıesiniń rezervtik qýatyn keńeıtý jáne COVID-19 indetimen kúreste shuǵyl kómek kórsetý úshin jańa medıtsınalyq mekemelerdi jedel turǵyzý qajettigi týraly sheshim qabyldady. Osylaısha elimizdiń iri qalalarynda 16 modýldik aýrýhana salyndy.
Aýrýhanalar men ortalyqtar zamanaýı kompıýterlik tomografııa, rentgen, ýltradybystyq apparattarmen, qýatty zerthanamen jáne taǵy basqa medıtsınalyq quraldarmen jabdyqtaldy. Buǵan deıin Almatyda 300 oryndyq eń qýatty jyldam salynatyn modýldik aýrýhananyń paıdalaný merzimi 50 jylǵa jetetini týraly habarlanǵan edi.
Jalpy alǵanda Almatyda eki medıtsınalyq mekeme, al Astana, Kókshetaý, Atyraý, Qulsary, Taldyqorǵan, Oral, Qostanaı, Qyzylorda, Aqtaý, Pavlodar, Petropavl, Jezqazǵan, Túrkistan jáne Shymkent qalasynda bir aýrýhana (ortalyq) salyndy.
Koronavırýs qaýpiniń beti qaıtqan soń oryndar bosady, sondyqtan tez salynatyn modýldik aýrýhanalar men ortalyqtardyń kópshiligi qalalyq medıtsınalyq mekemelerge berildi. Densaýlyq saqtaý mınıstrligi kezinde jedel salynǵan 16 aýrýhananyń tek ekeýi, ıaǵnı Atyraý men Qulsary qalasyndaǵy aýrýhana ýaqytsha jabylǵanyn habarlap otyr.
Kókshetaýda aýrýhana 42 ınfektsııalyq jáne 46 pallıatıvtik tósekke aýystyrylǵan, qazir «Kókshetaý kópsalaly qalalyq aýrýhanasy» MKK ınfektsııalyq aýrýlar ortalyǵy dep atalady.
Taldyqorǵanda aýrýhana oblystyq ınfektsııalyq aýrýhana retinde jumys istep tur.
Oral qalasynda salynǵan aýrýhana búginde qyzylshamen aýyratyn naýqastarǵa arnalǵan 100 ınfektsııalyq tósek-jaıǵa, bronh-ókpe aýrýlary bar naýqastarǵa arnalǵan 50 ońaltý ornyna, tótenshe jaǵdaı kezinde 30 karantındik jáne 20 tósek-jaıǵa aýystyrylǵan.
Qostanaıda juqpaly aýrýlar aýrýhanasyn ornalastyrýǵa arnalǵan modýldik keshen «Qostanaı oblystyq balalar aýrýhanasy» KMK-ge ýaqytsha paıdalanýǵa berildi. Tolyq qýatta jumys isteıdi.
Qyzylordadaǵy jyldam salynatyn modýldik aýrýhana «Qyzylorda oblystyq onkologııalyq ortalyǵy» ShJQ KMK balansyna berildi. Ortalyqtyń qýaty 205 tósekke deıin ulǵaıtyldy.
Aqtaýdaǵy modýldik aýrýhana «Mańǵystaý oblystyq kópbeıindi aýrýhana» ShJQ MKK balansyna berilgeli jatyr.
Pavlodardaǵy modýldik aýrýhana «Ǵ. Sultanov atyndaǵy Pavlodar oblystyq aýrýhanasy» KMK ınfektsııalyq bólimshesi retinde jumys isteıdi.
Petropavldaǵy «oblystyq ftızıopýlmonologııa ortalyǵy» ShJQ KMK modýldik aýrýhanasy «birinshi qalalyq aýrýhana» ShJQ KMK jáne «kópbeıindi oblystyq balalar aýrýhanasy» ShJQ KMK balansyna berildi. Tolyq qýatta jumys isteıdi.
Túrkistandaǵy 200 tósek-orny bar jyldam salynǵan modýldik juqpaly aýrýlar aýrýhanasy qalalyq aýrýhanaǵa aınaldy.
«Jezqazǵan qalasynyń oblystyq kópsalaly aýrýhanasy» ShJQ KMK-ǵa jatatyn Jezqazǵan aýrýhanasy 35 tósek-oryn ınfektsııalyq ortalyǵy 15 tósek-jaı teri-venerologııalyq bólimshe jáne 33 tósek-orny pedıatrııalyq bólimshe retinde jumys isteýde.
Almatyda qýaty 280 jáne 300 bolatyn eki jyldam salynatyn modýldik ınfektsııalyq aýrýhana Almaty DSB «MGKIB» ShJQ KMK balansynda. Ekeýide tolyq qýatta jumys isteıdi.
Astanadaǵy qalalyq ınfektsııalyq ortalyq Astana qalasy ákimdiginiń «kópsalaly medıtsınalyq ortalyq» ShJQ MKK balansyna berildi jáne pallıatıvtik bólimshe rejıminde jumys isteıdi.
Shymkenttegi «Asar» modýldik ınfektsııalyq ortalyǵy qaıta qaralyp, «qalalyq balalar klınıkalyq aýrýhanasy» ShJQ MKK balansyna berildi. Qazir onda balalarǵa arnalǵan somatıkalyq tósek-jaı ornalastyrylǵan.