COVAX-19 ekpesin alǵan Qaısar Tabynov: Densaýlyǵym qalypty

ALMATY. QazAqparat – Qazaq Ulttyq agrarlyq ýnıversıteti janyndaǵy Halyqaralyq Vaktsınologııa ortalyǵynyń dırektory Qaısar Tabynov QazAqparat tilshisine ózi synaqtan ótkizip jatqan COVAX-19 ekpesi týraly aıtyp berdi.

Vırýsolog bul qadam Qazaqstan úshin asa mańyzdy tájirıbe bolatynyn aıtty.

Koronavırýsqa qarsy ekpeni qabyldaǵanyńyzǵa bir apta ýaqyt bolǵan eken. Qazir densaýlyǵyńyz qalaı?

Avstralııalyq Vaxine Pty ltd shyǵarǵan COVAX-19 ekpesin qabyldaǵanyma 8-kún ótti. Keshe ımmýnıtetimniń qanshalyqty jumys istep jatqanyn bilý úshin bıohımııalyq jáne gematologııalyq qan taldaýyn tapsyrdym. Barlyq kórsetkishter qalypty bolyp tur. Vaktsınalyq aqýyzǵa antıdeneler kórsetkishi kelesi aptada shyǵady.

Búkil álemge beımaǵlum zatty synaýǵa qalaı bel býdyńyz?

Bizde sol kompanııamen ǵylymı áriptestik ornaǵan. Bul tek atalǵan vaktsınany Qazaqstanǵa ákelý dep túsinbeý kerek. Ǵylymı áriptestiktiń bir sharty bolǵandyqtan, biz bul vaktsınany óz aǵzamyzǵa synap kórdik. Bul zertteý jumystarynyń ekinshisi fazasy. Birinshi kezeńi sátti synaldy. AQSh-ta bul ekpe janýarlarǵa salynyp kórdi. Klınıkalyq synaq sátti aıaqtaldy. Bir aptadan soń áriptester ekinshi fazany bastamaqshy. Sondyqtan, bul beımaǵlum zat dep aıtýǵa bolmaıdy.

Vaktsına alǵan soń belgili bir rejımmen ómir súrý kerek pe?

Bul resmı hımııalyq zertteý emes. Klınıkalyq synaq hattamasynda adamdardan oqshaýlaný shart emes dep jazylǵan. Tek karantın kezindegi barlyq gıgıenalyq talaptardy oryndaý kerek.

Ekinshi ret vaktsına alatyn boldyńyz ba?

Qaıtalama vaktsınany 2 aptadan soń alady dep kórsetilgen. Ǵalymdar qaýipsizdik deńgeıin baqylaý úshin IgGk spaık-aqýyz ben vırýsty beıtaraptandyratyn ımmýnıtet jaýabyn baqylaıtyn bolady.

Búkil álemde ortaq vaktsına bolýy múmkin be?

Vaktsına oılastyryp jatqan elder kóp. Alaıda, olardyń árqaısysy óz eline vaktsına shyǵarýǵa qabiletti dep aıta almaımyn. Kóp elder qazir kúsh biriktirip jatyr. Birneshe vaktsına bolady. Qazaqstan da jaqynda ımmýnızatsııa men vaktsına boıynsha jahandyq alıans quramyna kirdi. Bul degenimiz – Qazaqstan aldyn ala tólem jasap, vaktsınaǵa ótinim beredi degen sóz. Ekpemen halyqtyń 20 paıyzy qamtylatyn bolady. Bul qarjylyq múmkindigi shekteýli elder úshin jasalǵan. Vaktsına satylymǵa da shyǵarylady. Bálkim buǵan deıin bizdiń de vaktsına daıyn bop qalar. Jahandyq klınıkalyq synaqtarǵa qatysý – elimizge baǵa jetpes tájirıbe bolary sózsiz. Keıbir qaýipterge qaramastan COVID-19-vaktsınasyn tómen baǵada alýǵa múmkindik týady.

Suhbatyńyzǵa rahmet!