CQO densaýlyq saqtaý basqarmasynyń basshysy qyzmetinen ketti

PETROPAVL. QazAqparat – Soltústik Qazaqstan oblysy densaýlyq saqtaý basqarmasynyń basshysy Nurlan Aımanov óz erkimen qyzmetinen ketti, dep habarlaıdy QazAqparat tilshisi.

SQO densaýlyq saqtaý basqarmasy baspasóz qyzmetiniń málimetinshe, Nurlan Aımanovtyń densaýlyq saqtaý basqarmasy basshysy qyzmetinen ketýine onyń basqa jumysqa aýysýy sebep bolǵan. Eks-sheneýnik endi oblystyq kópsalaly balalar aýrýhanasyn basqarady.

Nurlan Aımanov SQO-nyń densaýlyq saqtaý salasyn 2022 jyldyń qańtar aıynan osy kúnge deıin basqardy.

Nurlan Baqdáýletuly 1982 jyly Aqtóbe qalasynda dúnıege kelgen.

2007 jyly Qazaq ulttyq medıtsınalyq ınstıtýtyn «pedıatrııa» mamandyǵy boıynsha bitirdi.

Eńbek jolyn 2007 jyly Almaty qalalyq № 1-shi balalar klınıkalyq aýrýhanasynda dáriger ıntern, balalar hırýrgi bolyp bastady.

2008-2013 jyldar aralyǵynda SQO balalar aýrýhanasynda balalar hırýrgi bolyp jumys istedi.

2016 jyly oblystyq balalar aýrýhanasynyń konsýltatıvti-dıagnostıkalyq emhanasy bas dárigeriniń orynbasary laýazymyna bekitildi.

2016-2019 jyldary Ǵabıt Músirepov atyndaǵy aýdannyń ortalyq aýdandyq aýrýhanasyn basqardy.

Al 2019 jyldan osy jyldyń qańtaryna deıin SQO densaýlyq saqtaý basqarmasy basshysynyń emdeý-aldyn alý jumystary jóninen orynbasary qyzmetin atqardy.

Esterińizge salaıyq, osydan birer kún buryn Petropavl ákimi Bolat Jumabekov te qyzmetinen ketken edi. Ázirge shahar basshysynyń orny bos tur.