CQO-da áskerı qyzmetten qashqan eki jigitke izdeý jarııalandy

<p>PETROPAVL. KAZINFORM &ndash; Soltústik Qazaqstan oblysynda áskerge alynyp, bólimge bara jatqan eki jigit qashyp ketken. Osy fakti boıynsha qylmystyq is qozǵaldy.</p>

SQO Qorǵanys isteri jónindegi departamenttiń málimetinshe, oqıǵa 27 sáýirde bolǵan. Qaraǵandy oblysynyń 85510 áskerı bólimine qyzmet ótkerý úshin jańadan shaqyrylǵan merzimdi áskerı qyzmetshiler Petropavl qalasynyń stantsııasynda "Samara-Qaraǵandy" poıyzyna otyrǵan.

Saǵat 19.39-da eki áskerı qyzmetshi vagonnan óz erkimen shyǵyp, belgisiz baǵytta qashyp ketken. 
Olar: 18.09.2004 jyly týǵan Vladıslav Aleksandrovıch Kovalenko jáne 21.09.2003 jyly týǵan Baqtııar Baýyrjanuly Qusaıynov.

Foto: SQO Qorǵanys isteri jónindegi departamenti

«Azamat áskerı qyzmetke shaqyrý týraly oblystyń nemese respýblıkalyq mańyzy bar qalanyń, astananyń jergilikti áskerı basqarý organy bastyǵynyń buıryǵy shyqqan kezden bastap áskerı qyzmetke shaqyryldy dep esepteledi. Áskerı qyzmetshi qyzmet ornyna barý jáne keri qaıtý kezinde de áskerı qyzmet mindetterin atqarady. 

SQO Qorǵanys isteri jónindegi departamenti bastyǵynyń 2024 jylǵy 27 sáýirdegi №67 buıryǵyna sáıkes bul azamattar merzimdi áskerı qyzmetke shaqyrylyp, olarǵa "qatardaǵy jaýynger" áskerı ataǵy berildi, 85510 áskerı bólimine áskerı qyzmet ótkerý úshin jiberildi», - delingen vedomstvonyń habarlamasynda. 

QR Qylmystyq kodeksiniń 441-bap, 2-tarmaǵy, ıaǵnı «Adamdar toby nemese adamdar toby aldyn ala sóz baılasý arqyly bólimdi nemese qyzmet atqarý ornyn óz betinshe tastap ketý, eger óz betinshe tastap ketý bir táýlikten astam ýaqytqa sozylsa, bes jylǵa deıingi merzimge bas bostandyǵynan aıyrý jazasy qoldanylady. 

Qazirgi ýaqytta áskerı qyzmetshiler izdestirilip jatyr. 

Buǵan deıin tasqyn týraly jalǵan aqparat taratty degen kúdikpen 2 qylmystyq, 13 ákimshilik is qozǵalǵanyn aıtqan edik.