Tsıfrlyq túrlený daǵdyly ekonomıkanyń turpatyn ózgertedi - Elbasy

NUR-SULTAN. QazAqparat - Dástúrli saýda salasyna jańa tehnologııalardyń enýi onyń tıimdiligin aıtarlyqtaı kóterdi. Bul týraly búgin XII Astana ekonomıkalyq forýmy barysynda QR Tuńǵysh Prezıdenti - Elbasy Nursultan Nazarbaev aıtty, dep habarlaıdy QazAqparat tilshisi.

«Tsıfrlyq túrlený bizge daǵdyly ekonomıka turpatyn ózgertedi. Búginde jahandyq ekonomıkalyq landshaft joǵary tehnologııalyq kompanııalarmen aıqyndalady. Máselen, naryqtyq quny boıynsha TOP-5 kompanııany Apple, Google, Microsoft, Amazon, Vincent syndy tehnologııalyq alyp kompanııalar qurap otyr. Olar dástúrli ónerkásiptik jáne ınvestıtsııalyq iri kompanııalardy yǵystyra túsýde», - dedi Elbasy.

N.Nazarbaevtyń dereginshe, atalǵan bes kompanııanyń jıyntyq quny búginde shamamen 3,5 trln dollardy quraıdy. Bul keıbir damyǵan memleketterdiń jalpy ishki ónimine teń. Máselen, búgingi kúni Germanııanyń jalpy ishki ónimi - 3,6 trln dollar.

«Dástúrli saýda salasyna jańa tehnologııalardyń enýi onyń tıimdiligin aıtarlyqtaı kóterdi. Aıtalyq, boljamǵa sáıkes teris faktorlar bolmaǵan jaǵdaıda, saýda soǵystaryn aıtyp otyrmyn, álemdik saýda áleýeti tsıfrlandyrýdyń arqasynda 2030 jylǵa qaraı jyl saıyn 2 paıyzdyq ósim kórsetetin bolady», - dedi QR Tuńǵysh Prezıdenti.