Tsıfrlyq teńge týraly feık aqparat kóp taraýda – UB qazaqstandyqtarǵa eskertý jasady

ASTANA. QazAqparat - Qazaqstan Ulttyq banki Tsıfrlyq teńge týraly feık aqparattardan saq bolý týraly eskertti, dep habarlaıdy QazAqparat.

Tsıfrlyq teńge qolma-qol aqsha men qolma-qolsyz aqshanyń ornyn aýystyrmaıdy, qoldanysta olarmen qatar júretin bolady.

Qazaqstan Ulttyq banki jáne QUB tólem jáne qarjy tehnologııalaryn damytý ortalyǵy (TQTDO) Tsıfrlyq teńge týraly feık aqparattar men habarlamalardyń paıda bolǵanyn eskertedi.

Tsıfrlyq teńge tóńireginde qyzyǵýshylyq artqandyqtan alaıaqtar joba týraly aqparatty teris maqsatta paıdalanyp, jurtty adastyrýǵa kóshti. Messendjerlerde jańalyqtar shyǵarylymy formatynda qolma-qol aqshany tsıfrlyq teńgemen aýystyrý týraly feık aqparattar men vıdeorolıkter tarap jatyr. Al, tsıfrlyq teńge jobasyna ınvestıtsııa salýdy jarnamalaýshylar alaıaqtyq saıttardy jasaýǵa kóshken. Bul habarlamalardyń barlyǵy da shyndyqqa janaspaıdy.

Tsıfrlyq teńge qolma-qol jáne qolma-qol aqshasyz aýdarymdardyń ornyn aýystyrý úshin shyǵarylmaǵan, ol qoldanysta qatar júretin bolady. Tsıfrlyq valıýta biregeı tehnologııalyq sıpattamalardyń arqasynda Qazaqstannyń Ulttyq tólem júıesin odan ári damytýdy kózdeıdi, onyń ishinde ınternetsiz tólem jasaý múmkindigi de paıda bolady.

Qazir «Tsıfrlyq teńge» jobasy ázirleý jáne synaqtan ótkizý kezeńinde tur. Ulttyq tsıfrlyq valıýtany engizý boıynsha naqty sheshim osy jyldyń sońyna deıin qabyldanady dep josparlanýda.

Ulttyq bank tsıfrlyq valıýtanyń artyqshylyqtary men táýekelderin, onyń aqsha-kredıt saıasatyna, qarjylyq turaqtylyqqa jáne tólem qyzmeti naryǵyna áserin jan-jaqty zerttep jatyr.