Tsıfrlyq damý salasyna jaýapty vıtse-mınıstrler úshin KPI júıesi engizilmek
«Árbir memlekettik organda tsıfrlandyrý salasyna vıtse-mınıstr bar. Qazirgi kezde tsıfrlandyrý boıynsha ár vıtse-mınıstrde naqty KPI bolýy úshin tıisti jumystardy atqaryp jatyrmyz. Bul turǵyda aqparattyq júıelerdiń qoljetimdigi, avtomattandyrýdyń tıimdiligi men sapasy eskeriledi», - dedi B. Mýsın Májilistegi Úkimet saǵatynda.
Onyń aıtýynsha, atalǵan KPI jyl sońyna deıin bekitiledi. Al kelesi jyldan bastap tıisti memlekettik organnyń tıimdiligin kórsetedi.
«Úılestirý Tsıfrlyq damý mınıstrligine bekitilgen. Osyndaı tetikter arqyly memlekettik organdardy qamtyp, tıisti deńgeıge shyǵarmaqpyz. Qazirgi kezde bir memlekettik organ avtomattandyrýda ilgeri kele jatsa, basqalary turalap qalǵan. Osyndaı organdarda arhıvteri tsıfrlanbaı, jumystar atqarylmaǵan. Máselen, qaǵaz qujattardy suratý qajettigi boldy, ıaǵnı zeınetaqyny rásimdeý kezinde eńbek kitapshasy suraldy. Men qyzmetke kirisken kezde osy máselemen aınalystym, sebebi tuǵyndar osyǵan baılanysty shaǵymdaryn aıtty. Shyn máninde, jergilikti jerlerde kadr máselesi boıynsha eńbek arhıvterin tsıfrlandyrmaıynsha, osynyń barlyǵyn júrgize almaımyz. 1998 jyldan bastap jumysqa kirisken adamdarǵa avtomatty túrde onlaın qyzmet kórsete alamyz, al erterekte jumysty isteýdiń bastaǵan adamdar eńbek kitapshalaryn tapsyrýǵa májbúr. Arhıfterdiń tsıfrlandyrylmaýy osyndaı jaǵdaıǵa alyp kelip jatyr. Sondyqtan osy máselelerdi KPI-da árbir vıtse-mınıstrge qoıamyz», - dedi B. Mýsın.