Tsıfrlyq banktiń Shymkenttegi alǵashqy fılıaly ashyldy

ShYMKENT. QazAqparat - Búgin Shymkent qalasynda Qazaqstandaǵy alǵashqy tsıfrlyq banktiń altynshy fılıaly ashyldy. «Altyn Bank» AQ fılıaldary buǵan deıin elimizdiń Nur-Sultan, Almaty, Aqtaý jáne Atyraý qalalarynda ashylyp, qyzmet kórsetýde, dep habarlaıdy QazAqparat tilshisi.

Elbasynyń «Tsıfrlyq Qazaqstan» memlekettik baǵdarlamasy aıasynda jumysyn bastaǵan atalǵan qarjy uıymynyń ashylý saltanatyna Qytaı Halyq Respýblıkasynyń Qazaqstan Respýblıkasyndaǵy elshisi Chjan Sıao men qala ákimi Erlan Aıtahanov qatysty.

Saltanatty sharada qala turǵyndary men bank qyzmetkerlerin jańa banktiń ashylýymen quttyqtaǵan qala basshysy zamanaýı tehnologııalyq trendter qarjy salasyn ózgertetinin atap ótti.

«Búgingi tańda bankterdiń 70% jeke jáne zańdy tulǵalarǵa ınternet pen mobıldi bankıng arqyly qyzmet kórsetedi. Bankterdiń 55% óz qyzmetterin mobıldi qosymsha negizinde usynady. Bul naryqqa óńirlik ınvestorlardyń qol jetkizýin jeńildetip, ınvestorlarǵa álemniń kez kelgen núktesinen qazaqstandyq qor naryǵynda qarjy quraldarymen saýda jasaýǵa múmkindik beredi», -dedi qala ákimi.

Aıta keteıik, «Altyn Bank» AQ qurǵan brend - jeke tulǵalarǵa qyzmet kórsetý boıynsha tolyqqandy tsıfrlyq bank. Basty artyqshylyqtary – 24/7 rejımindegi qyzmetterdiń qoljetimdiligi, yńǵaıly jaǵdaı men ınnovatsııalyq tsıfrlyq múmkindikter.

Barlyq ónimderi men protsesteri ıaǵnı, shot ashý men debettik karta shyǵarý, halyqaralyq valıýta aýdarymyn jiberý men kepilsiz kredıt alǵanǵa deıingi qyzmet onlaın rejımde kórsetiledi.