Tsıfrlandyrý nátıjesinde 2,5 myń memlekettik qyzmetshi qysqarady

KÓKShETAÝ. QazAqparat - Memlekettik organdardyń qyzmetin tsıfrlandyrýǵa jáne memlekettik qyzmetterdi avtomattandyrýǵa kóp qor jumsaldy. «Tsıfrlyq Qazaqstan» memlekettik baǵdarlamasyn júzege asyrý esebinen 2,5 myńnan astam memlekettik qyzmetshini qosymsha qysqartý jáne osy arqyly únemdelgen qarajat esebinen jalaqyny qosymsha arttyrý josparlanyp otyr. Bul týraly Aqmola oblysyndaǵy memlekettik organdar basshylarymen kezdesken Memlekettik qyzmet isteri jáne sybaılas jemqorlyqqa qarsy is-qımyl agenttiginiń apparat basshysy Saıan Ahmetjanov aıtty, dep habarlaıdy QazAqparat tilshisi.

«Búgin eń kóp kórsetiletin memlekettik qyzmetterdi elektrondyq formatqa aýystyryp jatyrmyz. Qyzmet 78 paıyzy «Elektrondyq úkimet» pen HQO arqyly kórsetilýde. Bul jemqorlyqty azaıtýǵa yqpal etti. Bizdiń negizgi maqsatymyz - onlaın-qyzmetterge tolyq aýysyp, jemqorlyqty túbegeıli joıý» - dedi Saıan Ahmetjanov kezdesýde.

Qazirgi ýaqytta aqparattyq júıelerdiń ıntegratsııasy 30 paıyzdan asady. Elektrondy qyzmetterdiń damý kórsetkishteri boıynsha Qazaqstan elderdiń bastapqy top-tiziminde 25 orynǵa ıe.

Biraq sybaılas jemqorlyqqa qarsy tıimdi saıasatsyz memlekettik qyzmettiń sapaly reformalaryna qol jetkizý múmkin emes. Osyǵan oraı Agenttik Arnaıy monıtorıng toptary, Birinshi sybaılas jemqorlyqqa qarsy medıa ortalyq, jańarý jáne taǵy basqa úkimettik emes uıymdar sııaqty azamattyq qoǵam ınstıtýttarymen qurylymdyq árekettestikti jaqsartty. Belsendi azamattardy jergilikti deńgeıde memlekettik qarajattyń ıgerilýine monıtorıng júrgizýge tartýǵa baǵyttalǵan «Qoǵamdyq baqylaý kartasy» jobasy jumys isteýde.
«Bıznes pen ınvestıtsııalardy sybaılas jemqorlyqqa qarsy súıemeldeý» jobasyn júzege asyrý aıasynda agenttik qyzmetshileri kásipkerlermen birge bıznes-jobany júzege asyrýdyń barlyq kezeńderinen - ruqsattama qujattaryn alýdan kásiporynnyń sátti iske qosylýyna jáne turaqty jumys isteýine deıin ótedi.

«Bizdiń ustanymymyz - «jemqorlyqtyń saldarymen kúreskenshe, onyń aldyn alǵan ońaı». Búgingi tańda biz jalpy quny 5 trıllıon teńgeni quraıtyn 130-dan astam bıznes-jobany súıemeldeýmen aınalysamyz. Bıznesti sybaılas jemqorlyqqa qarsy súıemeldeý elimizdiń ınvestıtsııa tartýdaǵy «vızıt kartochkasyna» aınalýy tıis», - dep tolyqtyrdy Saıan Ahmetjanov.

Kezdesý sońynda apparat basshysy qatysýshylardy sybaılas jemqorlyqqa qarsy «Astana - adaldyq alańy» jáne «Sanaly urpaq» jobalarymen tanystyrdy.