Tsıfrlandyrý aıasynda stýdentterge arnalǵan jańa baǵdarlama engiziledi - Asqar Jumaǵalıev

ASTANA. QazAqparat - Tsıfrlandyrý aıasynda ýnıversıtet stýdentterine arnalǵan jańa baǵdarlama engiziledi. Bul týraly Senattaǵy parlamenttik tyńdaýda QR Premer-Mınıstriniń orynbasary Asqar Jumaǵalıev málim etti, dep habarlaıdy QazAqparat.

«Tsıfrlyq Qazaqstan» baǵdarlamasy ýaqytynda bekitildi. Onyń ishinde bes mańyzdy baǵyt anyqtalǵan. Osylaısha, tsıfrlyq transformatsııa árbir salada ótkiziledi. Adamı kapıtal týraly aıtatyn bolsaq, tsıfrlandyrý bilikti mamandarǵa suranysty arttyrady. Osyǵan oraı, 11 myń grant  tehnıkalyq mamandyqtarǵa bólinedi. Bul qosymsha mamandardy daıarlaýǵa serpin beredi. Oǵan qosa, bastaýysh synyptarda ІT sabaqtar beriledi. Ýnıversıtet stýdentterine arnalǵan jańa baǵdarlama engiziledi. Baǵdarlama ónerkásip ókilderimen birge jazylady. Sonymen qatar «Nur Otan» Saıası keńesinde aıtalǵandaı, adamı kapıtaldy damytýǵa asa mán berilýde. Aıta ketsek, oqýshylarǵa tegin bir myń ІT-synyp jáne 20 ІT-ortalyq jobasy iske asyrylýda», - dep toqtaldy Úkimet basshysynyń orynbasary.

Munymen qosa ol búginde Qazaqstanda 447 qyzmet elektrondyq túrde kórsetiletinin atap ótti. Bul óz kezeginde anyqtamalardy, lıtsenzııalardy, ruqsatnamalardy jyldam alýǵa múmkindik berip, kásiporyndardy jeńil ashýǵa jaǵdaı jasady. Sonymen qatar aqparattyq júıelerdi ıntegratsııalaý esebinen el turǵyndarynan 40 mln anyqtama suralmaıtyn bolady. Osy oraıda tıisti jumystar jyl sońyna qaraı iske qosylady.

Budan buryn habarlanǵandaı, parlamenttik tyńdaý barysynda Senat tóraǵasy Qasym-Jomart Toqaev Qazaqstan halqyn tsıfrlyq ekonomıkaǵa jappaı tartý kerektigin atap ótti. 

Al QR Aqparat jáne kommýnıkatsııalar mınıstri Dáýren Abaev tsıfrlandyrýdyń alǵashqy nátıjeleri týraly aıtty.