Chıkagodaǵy Trump Tower ǵımaratynda qarýly áıel ustaldy

ChIKAGO. QazAqparat – Chıkagodaǵy Donald Trampqa tıesili kópqabatty úıde polıtsııa vıntovkamen qarýlanǵan áıeldi ustady, dep habarlaıdy QazAqparat Chicago Tribune-ge silteme jasap.

Chıkago polıtsııasynyń habarlaýynsha, Trump Tower ǵımaratyndaǵy qonaq úıde vıntovkasy bar áıeldiń qydyryp júrgeni týraly aqparat jergilikti ýaqytpen tańǵy 11:30 shamasynda túsken.

Áıel sol kúni ustaldy. Ony medıtsınalyq kýálandyrý úshin aýrýhanaǵa jetkizdi. Onyń ústinen qylmystyq is qozǵaldy.

Polıtsııa sársenbi kúni, ózderiniń pikirinshe, bul turmystyq sıpattaǵy sırek jaǵdaı ekenin málimdedi. «Turǵyndarǵa qaýip tónip turǵan joq», - dedi quqyqqorǵaýshylar.

Polıtsııa dereginshe, qarýly áıel ustalǵannan keıin zardap shekkender týraly aqparat túspegen.

Buǵan deıin Nıý-Iork prokýratýrasy AQSh-tyń burynǵy prezıdenti Donald Trampqa jalǵan qarjy qujattaryn jasady degen aıyp taqty. Osylaısha, Tramp qylmystyq iske aıyptalyp otyrǵan alǵashqy prezıdent atandy.