«Chevron Phillips» Qazaqstanda polıetılen óndirisin júzege asyrýy múmkin

NUR-SULTAN. QazAqparat – Qazaqstan polıetılen óndirý jobasyn iske asyrý úshin strategııalyq seriktes izdestirip jatyr. Bul týraly búgin Úkimet otyrysynda QR Energetıka mınıstri Nurlan Noǵaev aıtty, dep habarlaıdy QazAqparat tilshisi.

«Qýaty jylyna 1 250 myń tonna polıetılen óndirý jobasy boıynsha búgingi tańda strategııalyq seriktesti izdestirý jumysy júrgizilýde. Ol úshin lıtsenzııalyq tehnologııanyń bolýy, ótkizý naryqtaryna kepildik berý jáne qarjylandyrýdy uıymdastyrý múmkindigi syndy negizgi ólshemsharttar anyqtaldy. Solardyń negizinde munaı-gaz hımııa kompanııalarynyń toptary qalyptastyryldy», - dedi Nurlan Noǵaev.

Mınıstrdiń aıtýynsha, qazirgi ýaqytta Chevron Phillips Chemical kompanııasymen kelissózder bastaldy. Atalǵan kompanııa óziniń «MarTECH» lıtsenzııalyq tehnologııasyn jáne off-take kelisimshartyn súıemeldeýge qatysty kómegin usynyp otyr.

«Yntymaqtastyq, onyń ishinde jobaǵa qatysý týraly egjeı-tegjeıli máseleler jaqyn arada talqylanatyn bolady. Strategııalyq seriktesti tartýdyń negizgi sharty – jobany shıkizatpen qamtamasyz etý bolyp tabylatyndyqtan, búgingi tańda Teńizshevroılmen birlesip, qýaty 9,7 mlrd tekshe metr gaz aıyrǵysh qondyrǵyny – qurǵaq gazdan etan alýǵa arnalǵan qajetti ınfraqurylymdy salý máselesi pysyqtalýda», - dedi ol.

Onyń atap ótýinshe, japondyq Japan Gasoline Co. Holdings Corporation kompanııasy jobalyq-smetalyq qujattamany ázirleý boıynsha jumystar júrgizýde. Ony aıaqtaý osy jyldyń sońyna josparlanǵan.