Cherchesov Qazaqstan quramasynyń jeńilisine qatysty pikir bildirdi

<p>ASTANA. KAZINFORM &ndash; Qazaqstan quramasynyń jańa bas bapkeri Stanıslav Cherchesov ulttyq quramanyń joldastyq kezdesýleri jaıly oıyn ortaǵa saldy.</p>

«Men Qazaqstan quramasynyń eki joldastyq oıynyn da kórdim. Erevandaǵy oıyn sátsiz bastaldy, alǵashqy mınýttarda gol jiberip aldy. Biraq, Ázerbaıjanmen bolǵan kezdesýde jigitter birinshi taımnyń ortasynda alǵa shyǵyp, múlde basqasha oınady. Keıin ázerbaıjandyqtar dopqa kóp ıelik ete bastady. Jigitter nelikten dopty qarsylasqa ońaı berip qoıǵanyn túsinbeımin. Aıta ketý kerek, bul joldastyq kezdesý, eki komanda da qorǵanysta nashar oınady. Oıynnan keıin men kıim aýystyratyn bólmege kirip, qyrkúıek aıyndaǵy matchtarǵa deıin qatelerimizdi túzetip alýymyz úshin jigitterge nemen aınalysý kerektigin aıttym. Sheberlikterińizdi synaý úshin joldastyq kezdesýler qajet. Áli de shyńdaıtyn dúnıeler kóp», - dedi Cherchesov.

Aıta keteıik, joldastyq kezdesýlerde ulttyq quramany alańǵa Rýslan Baltıev bastap shyqqan bolatyn. Bas bapker qyzmetine 3 maýsymda taǵaıyndalǵan Cherchesov jumysqa keıin kirisedi.

Esterińizge salsaq, keshe joldastyq kezdesýde Qazaqstan quramasy Ázerbaıjanǵa jeńilip qalǵan bolatyn.