Chempıondar lıgasy: «Inter» 13 jyldan keıin fınalǵa shyqty

ASTANA. QazAqparat - Fýtboldan UEFA Chempıondar lıgasy fınalyna joldama alǵan alǵashqy komanda anyqtaldy, dep habarlaıdy QazAqparat tilshisi.

Jartylaı fınaldaǵy Italııanyń «Inter» jáne «Mılan» kezdesýi tartysty ótti. Alǵashqy oıynda «Inter» syrt alańda qarsylasyn 2:0 esebimen tize búktirgen edi.

Bir qalanyń atynan synǵa túsip júrgen qos ujym kóp jyldan beri atalǵan týrnırdiń mundaı satysyna deıin jetken emes.

Sondyqtan jankúıerler olardan tartysty oıyn kútkeni anyq.

Búgingi kezdesýde qos komanda fýtbolshylary jeńiske jetýge bar kúshin saldy. Oıynnyń birinshi kezeńinde tablodaǵy esep ózgergen joq.

Ekinshi kezeńde «Inter» sapynan Laýtaro Martınes 74-mınýtta qaqpany dál kózdedi.

Osylaısha olar qarsylasynan 1:0 esebimen basym túsip, fınalǵa joldama aldy.

Aıta ketsek, «Inter» jarystyń atalǵan satysyna 13 jyldan keıin joldama alyp otyr. 2010 jyly bul klýb atalǵan týrnırdiń jeńimpazy atanǵan edi.

Endi olar fınalda «Manchester Sıtı» (Anglııa) - «Real Madrıd» (Ispanııa) jubynyń jeńimpazymen kezdesedi.

Olardyń arasyndaǵy alǵashqy kezdesý 2:2 esebimen teń aıaqtaldy.

Bul komandalar mamyrdyń 17-nen 18-ne qaraǵan túni oınaıdy.