Chelıabi-Novosibir avtojolyn jóndeý keler jyly aıaqtalady
«AMANAT» partııasy Soltústik Qazaqstan oblystyq fılıaly baspasóz qyzmetiniń málimetinshe, Petropavldan Qorǵan shekarasyna deıingi M-51 «Chelıabi-Novosibir» respýblıkalyq mańyzy bar jol ýchaskesi 2017 jyly qaıta jańartyla bastady. Alaıda merdigerler kelisimshartty oryndamaı, saldarynan sot uzaqqa sozylyp, jumys tek osy jyly ǵana qaıta jalǵasyn tapty.
Qazirgi ýaqytta bul nysanda jumysty «QazStroıTehnık» JShS júzege asyryp jatyr. Mamlıýtkadan «Jańa jol» beketine deıin qaıta jańartylatyn ýchaskeniń jalpy uzyndyǵy – 56 km. Bul maqsatqa respýblıkalyq bıýdjetten shamamen 10 mlrd teńge bólindi, onyń 3,5 mlrd teńgesi bıyl ıgerilýi tıis.
«Jumys eki jylǵa shaqtalǵan. Uıymdastyrýshy – «QazAvtoJol» UK» AQ. Búgingi tańda 14 km jolǵa jabynnyń tómengi qabatyn tóseý boıynsha jumystar júrgizildi, endi 16 km qaldy. Qazirgi ýaqytta negizgi joldyń tósemin salý jáne aınalma joldy jóndeý jumystary júrgizilip jatyr. 2024 jyly nysan daıyn bolýy kerek. Biz jumystyń ýaqtyly júrgizilýin qadaǵalaımyz», - deıdi «AMANAT» partııasy Mamlıýt aýdandyq fılıalynyń tóraǵasy Altyn Saǵıtova.
Partııa músheleri Soltústik Qazaqstan oblysynda joldardy, sonyń ishinde respýblıkalyq mańyzy bar joldardy qaıta jańartý men jóndeýge monıtorıng júrgizedi. 1 naýryzda partııa tóraǵasy Erlan Qoshanov respýblıkalyq saılaýaldy shtabtyń óńirge sapary barysynda osyndaı tapsyrma bergen bolatyn. Máselen, búginde óńirde partııalyq baqylaý komıssııalary janynan 15 monıtorıngtik top jumys isteıdi.
«Chelıabi-Novosibir» tasjolynan basqa partııalyqtar Aqjar jáne Ýálıhanov aýdandary arqyly ótetin «Kókshetaý-Omby» A-13 jolynyń 182-213 km kúrdeli jóndeý barysyn, Aqmola oblysynyń shekarasynan Saýmalkól aýylyna deıingi «Kókshetaý-Rýzaevka» R-11 jolynyń ortasha jóndeý barysyn, sondaı-aq Maǵjan Jumabaev aýdanynda «Chelıabi-Novosibir» M-51 tasjolynyń ýchaskesin baqylaıdy.
Aıta ketsek, oblys boıynsha respýblıkalyq mańyzy bar avtomobıl joldarynyń jalpy uzyndyǵy – 1 970 km.