Chelah jyl saıyn sot úkimine qatysty shaǵym túsiredi - Bas áskerı prokýror

Bas áskerı prokýror Dastan Sákenov 2012 jyly «Arqankergen» shekara beketindegi oqıǵa boıynsha isti bolǵan Vladıslav Chelahtyń shaǵymdaryna qatysty pikir bildirdi, dep habarlaıdy QazAqparat tilshisi.

«2012 jyly Chelahtyń isi boıynsha sot úkimi shyqty. Sodan keıin talaı ret shaǵymdanǵan bolatyn. Bul shaǵymdar Bas prokýratýra men Joǵarǵy sotta belgilengen tártip boıynsha qaraldy. Biraq V. Chelahtyń is boıynsha aıtqan derekteri dáleldengen joq. Meniń oıymsha, sondyqtan sottyń úkimi zańdy», - dedi D. Sekenov Senattyń jalpy otyrysynan keıin tilshiler suraǵyna jaýap bere otyryp.

Onyń aıtýynsha, V. Chelahtan jyl saıyn aryzdar túsedi. Bas áskerı prokýratýra olardy jan-jaqty qarastyryp keledi.

«Ol óz shaǵymynda tyń málimetter kórsetetin shyǵar dep onyń aıtqandaryn tyńǵylyqty zerttep kelemiz. Biraq, ol burynǵy málimetterdi jazyp jatyr», - dedi Bas áskerı prokýror.

Eske sala ketsek, 2012 jyly mamyrdyń 27-sinen 28-ine qaraǵan túni Almaty oblysynyń «Arqankergen» shekara beketinde 14 shekarashy jáne bir qoryqshy qaza tapty. Aman qalǵan on besinshi sarbaz Vladıslav Chelah shekara beketinen 20 shaqyrym jerde ornalasqan qystaýdan tabyldy. Tergeý jumysy barysynda V. Chelah basty kúdikti retinde qarastyrylyp, qamaýǵa alyndy. Sońynda V. Chelah ómir boıyna bas bostandyǵynan aıryldy jáne Qostanaı oblysyndaǵy «Qara búrkit» túrmesine jiberildi.