Chehııanyń vıtse-premeri poıyzdardyń soqtyǵysý sebebin aıtty

PRAGA. QazAqparat – Plzen qalasy (Chehııanyń batysy) men Mıýnhen arasynda júretin «Batystyq ekspress» poıyzy mashınısiniń abaısyzdyǵy Chehııanyń batysyndaǵy Domajlıtse qalasynyń mańyndaǵy Mılavche eldi mekeni mańynda jolaýshylar poıyzdarynyń soqtyǵysýyna sebep bolǵan, dep habarlaıdy QazAqparat.

Bul týraly Chehııanyń vıtse-premeri, Ónerkásiptik saýda mınıstrliginiń basshysy jáne kólik mınıstri Karela Gavlıcheka Twitter -degi paraqshasynda jazdy.

«Ex-351 poıyzy (temirjoldyń bir joldy ýchaskesine) semafordyń tyıym salynǵan sıgnalyna shyǵyp, basqa jolaýshylar poıyzymen soqtyǵysyp qalǵan. Jaǵdaı óte aýyr. Men barlyq jumys baǵdarlamamnan (josparlanǵan kezdesýlerden) bas tarttym. Men qaıǵyly jaǵdaı oryn alǵan jerge baramyn», - dep jazdy ol.

ČTK aqparat agenttigi habarlaǵandaı, Germanııanyń jedel medıtsınalyq járdem qyzmetiniń ókilderi Batys Chehııaǵa jolaýshylar poıyzdary soqtyǵysqan jerge bet aldy, barlyǵy bes jedel járdem kóligi jiberildi.

Domajlıtse qalasynyń mańyndaǵy Mılavche eldi mekeni mańynda poıyzdardyń soqtyǵysýy saldarynan eki adam qaza taýyp, jeteýi aýyr jaraqat alǵan, olardyń jaǵdaıy aýyr. Taǵy 31 adam zardap shekti, biraq olardyń jaǵdaıy jaman emes.