Chehııalyq kompanııa Qazaqstanda detonator shyǵarýǵa qyzyǵýshylyq tanytyp otyr

NUR-SULTAN. QazAqparat - Chehııalyq Austin Detonator s.r.o kompanııasy qazaqstandyq seriktestermen birlesken ınvestıtsııalyq jobalardy júzege asyrýǵa nıetti. Bul týraly KAZAKH INVEST ulttyq kompanııasymen kezdesýde Austin Detonator kompanııanyń aımaqtyq dırektory Lıbor Bartek aıtty, dep habarlaıdy QazAqparat.

Austin Detonator ókilderiniń aıtýynsha, qazaqstandyq naryq kompanııa úshin úlken qyzyǵýshylyq týdyrýda jáne ózgergen halyqaralyq jaǵdaıǵa baılanysty olar yntymaqtastyqty keńeıtý jáne Qazaqstanda zaýyt ashý múmkindikterin qarastyrýda.

«Bizde buryn qazaqstandyq kompanııalarmen jumys isteýdiń tabysty tájirıbesi bar. Qazir biz kompanııanyń qazaqstandyq naryqtaǵy úlesin arttyrýǵa múddeli ekenimizdi bildiremiz. Yntymaqtastyǵymyzdy keńeıtý úshin zaýyt ashýdy josparlap otyrmyz, ol tek qazaqstandyq naryqty ǵana emes, sonymen qatar basqa elderdiń naryqtaryna eksporttaıtyn bolady», - dedi Lıbor Bartek.

«Sizderdiń kásiporyn ónimderiniń 97 paıyzy eksportqa shyǵarylatynyn bilemiz. Óndiristerdi Qazaqstanda ornalastyrý arqyly siz taýardy jetkizý tizbegin jaqsarta alyp jáne de jańa naryqtarǵa shyǵa alatynyna senimdimiz», - dep atap ótti Basqarma tóraǵasynyń orynbasary Jandos Temirǵalı.

Austin Detonator (Austin Powder Company holdıginiń bóligi) Eýropadaǵy ónerkásiptik jarylys jumystaryna arnalǵan detonatsııalyq materıaldardyń eń iri óndirýshisi bolyp tabylady. Ónimder jelisi alýan túrli jáne munaı-gaz ónerkásibine arnalǵan elektrlik/elektrlik emes jalpy maqsattaǵy detonatorlardy, elektrondy júıelerdi, sondaı-aq detonatsııalyq materıaldardy óndirýge arnalǵan komponentterdi: praımerlerdi, tolqyn ótkizgishterdi, tutaný bastıekterin jáne t.b. Austin Europe Eýropalyq aımaqta jalpy sany 1000-nan astam qyzmetkeri 12 ókildigi bar. Kompanııa búkil álem boıynsha ónimderdi jetkizedi jáne jarylys, tehnıkalyq qoldaý jáne jarylys jumystaryn ońtaılandyrý qyzmetterin usynady.

Austin Detonator ókilderiniń sapary KAZAKH INVEST pen Qazaqstannyń Chehııadaǵy Elshiliginiń qoldaýymen uıymdastyryldy.

Foto: invest.gov.kz