ChatGPT jasandy ıntellektisine negizdelgen iOS-qa arnalǵan baǵdarlama iske qosylady

VAShINGTON. QazAqparat – OpenAI kompanııasy ChatGPT jasandy ıntellektisine negizdelgen iOS platformasyndaǵy qurylǵylarǵa arnalǵan chat-baǵdarlamasyn iske qosatynyn málimdedi. Baǵdarlama jaqyn arada AQSh paıdalanýshylary úshin qoljetimdi bolady, keıinirek basqa elderde de iske qosylady, dep habarlaıdy QazAqparat TASS agenttigine silteme jasap.

«Búgin biz iOS-qa arnalǵan ChatGPT baǵdarlamasyn iske qosamyz. ChatGPT-di tegin paıdalanasyz, ol sizdiń barlyq qurylǵydaǵy tarıhyńyzdy sınhrondaıdy», - delingen kompanııa málimdemesinde.

Sondaı-aq kompanııa osyǵan uqsas ónimniń Android platformasyndaǵy qurylǵylarǵa arnalǵan nusqasyn da tanystyrdy.

OpenAI kompanııasynyń ChatGPT chat-boty 2022 jyldyń sońynda iske qosyldy. Júıe paıdalanýshylarmen dıalog túrinde baılanysady. Chat-bot qosymsha suraqtarǵa jaýap berip, qatelikterin moıyndap, qate pikirlerdi daýlap, orynsyz saýaldardy qabyldamaı qoıa alady. Júıeniń múmkindikteri qoǵamnyń nazaryn aýdartty. Ony túrli elderdegi stýdentter emtıhan men akademııalyq jumystaryn tapsyrý úshin paıdalanǵannan keıin ol synǵa ushyrady.