Tsentrkredıt bank sanktsııa tiziminen Alfa-bankti shyǵarý qadamdaryn bastaıdy

NUR-SULTAN. QazAqparat – Alfa-bank Qazaqstan bankin satyp alǵan Tsentrkredıt bank AQSh-tyń Qarjy mınıstrligine ótinim joldaıdy. Bul týraly QR Qarjy naryǵyn retteý jáne damytý agenttiginiń tóraǵasy Mádına Ábilqasymova málim etti, dep habarlaıdy QazAqparat tilshisi.

«Alfa-bank boıynsha santsııalar 6 mamyrda kúshine endi. Osy merzimge deıin bul bank shetel valıýtasynda jáne basqa da operatsııalardy júrgize aldy. Alfa bank TsentrKredıt bankine satylǵanyn bilesizder. Endi TsentrKredıt AQSh-tyń qarjy mınıstrligine qarasty shetel aktıvteri jónindegi basqarmasyna júginip, bankti sanktsııa tiziminen shyǵarý ótinimin jasaı alady», - dedi M. Ábilqasymova Májiliste tilshiler saýalyna jaýap bere otyryp.

Osy oraıda ol osy sanktsııa tiziminen shyǵýdyń jalǵyz joly retinde aktsıonerdi tolyqtaı aýystyrý qadamdary jatatynyn aıtty.

«Ekinshiden, bank ataýyn ózgertý iske asyrylyp, qaıta tirkeý júrgizilýi kerek. Osy jaǵdaıda atalǵan bankti sanktsııa tiziminen shyǵarýǵa ruqsat etiledi. Bul rette Alfa-bank qysqa merzimde tıisti jumystardy atqardy», - dedi Mádına Ábilqasymova.

Budan buryn habarlanǵandaı, agenttik basshysy úsh reseılik bank boıynsha birqatar klıenttiń shottary 3 mlrd teńgege buǵattalǵanyn aıtty.

6 mamyr kúni Bank TsentrKredıt «Alfa-bank Qazaqstan» enshiles banki» aktsıonerlik qoǵamynyń jaı aktsııalaryn satyp alǵanyn málimdedi.