«Tselınnyı» kınoteatry zamanaýı óner ortalyǵyna aınalady

ALMATY. QazAqparat- «Tselınnyı» kınoteatrynyń ornynda jańa qalalyq zamanaýı óner ortalyǵy paıda bolady. Bul týraly Almaty ákimi Erbolat Dosaev Almaly aýdanynyń turǵyndarymen kezdesýinde aıtty, dep habarlaıdy QazAqparat tilshisi.

Erbolat Dosaev burynǵy «Tselınnyı» kınoteatryn qalpyna keltirý jumystary 2023 jyldyń sońyna deıin aıaqtalatynyn aıtty.

«Jumys barysynda qasbettiń joǵarǵy qabattarynyń astynda biregeı mozaıka tabyldy, sondyqtan ruqsattar qajet boldy. Kelesi jyldyń sońyna deıin Almatyda jańa mádenıet oshaǵy boı kóteredi dep senemin. Kınoteatr bolǵandyqtan, ol jańa zamanaýı standarttarǵa sáıkes kelmeıdi»,- dedi ol.

Buǵan deıin «Tselınnyı» zamanaýı mádenıet ortalyǵynyń dırektory Djama Nurqalıeva ǵımarattyń buzylmaıtynyn aıtqan bolatyn.

Kınoteatrdy qaıta qurý jumysyna jergilikti jáne sheteldik kóptegen mamandar tartylǵan. Atalǵan jumys aıasynda qorshaǵan ortany da tolyǵymen abattandyrý kózdelip otyr.

Aıta ketsek, «Tselınnyı» kınoteatry 1964 jyly salynyp, 2014 jylǵa deıin jumys istedi.