Caıasattanýshy Prezıdent Joldaýyndaǵy mańyzdy 3 máseleni atady

NUR-CULTAN. QazAqparat – Caıasattanýshy Baýyrjan Serikbaev Prezıdenttiń búgingi Joldaýyndaǵy mańyzdy 3 máseleni atady. QazAqparat saıasattanýshynyń pikirin jelidegi paraqshasyna silteme jaı otyryp, tolyq jarııalaıdy.

***

Birinshi, muǵalimderdiń jalaqysy aldaǵy ýaqytta da ósetin bolady. Osy maqsatta prezıdent bıýdjetten qarjy bólýdi tapsyrdy. Qazir aýyldy jerlerde 10-15 jyl stajy bar muǵalimder, tolyq stavkamen 200-300 myń teńge arasynda jalaqy alady. Aldaǵy ýaqytta da bul óse beretin bolsa muǵalimder úshin jaqsy ózgeris.

Ekinshi, ǵalymdardyń jalaqysy ósedi. Jaqynda Ulttyq ýnıversıtetterdegi professorlardyń jalaqysy 450 myń teńgeden kem bolmasyn degen mınıstrlik talaby shyqqan. Endi prezıdent tapsyrmasymen ǵalymdarǵa beriletin memlekettik granttar 3 jyldan 5 jylǵa deıin uzartylady. Ǵylymmen aınalysý úshin granttar sany da artady. Ǵylymı ınstıtýt ǵalymdarynyń, ýnıversıtet ustazdarynyń jaǵdaıy jaqsarady degen sóz. Sabaq berýmen, grant arqyly ǵylymmen qatar aınalysatyn ǵalymdardyń tabysyn esepteı berińiz.

Úshinshi, mádenıet salasy qyzmetkerleri, qoryqshylar, kitaphanashylar, tehnıkalyq sala qyzmetkerleriniń jalaqysy jyl saıyn 20%-ke ósedi. Bul elimiz boıynsha 600 myń azamatty qamtıdy.

Sońǵy kezderi muǵalimder men ǵalymdarǵa memleket barlyq jaǵdaıdy jasap jatyr. 2025 jylǵa qaraı tek ǵylymnyń ózine ІJÓ-niń 1% bólinetin bolady. Meniń oıymsha ǵylym salasyna, ýnıversıtette ustazdyq etetin ǵalymdar, muǵalimder aldaǵy 3-4 jylda elimizdegi jalaqysy men tabysy kóp eń bedeldi mamandyqtar qatarynda bolady. Soǵan kele jatyrmyz. Jastar osyǵan beıimdelýi kerek dep oılaımyn.