«Capital Bank Kazakhstan» salymshylarynyń depozıti tolyq óteledi – agenttik
«Bank salymshylarynyń, jeke tulǵalardyń 99%-nyń depozıtteri «Qazaqstannyń depozıtterge kepildik berý qory» AQ-tyń kepildigimen tolyq kólemde óteledi», - delingen Agenttik taratqan habarlamada.
Agenttik Tóraǵasynyń 2021 jylǵy 24 maýsymdaǵy №206 buıryǵymen ýaqytsha ákimshilik taǵaıyndaldy, oǵan Banktiń barlyq basqarý organdarynyń ókilettikteri aýysty. Ýaqytsha ákimshilik Banktiń taratý komıssııasy taǵaıyndalǵanǵa deıin áreket etetin bolady.
Ýaqytsha ákimshiliktiń basshysy bolyp Agenttiktiń qyzmetkeri Sholpan Taıshyqqyzy Toqseıitova taǵaıyndaldy. 2021 jylǵy 25 maýsymnan bastap QR zańnamasynda kózdelgen jaǵdaılardy qospaǵanda, klıentterdiń jáne Banktiń óziniń bank shottary boıynsha barlyq operatsııalar toqtatyldy.
Agenttik zańnamada belgilengen tártippen sotqa Banktiń qyzmetin májbúrlep toqtatý (taratý) týraly ótinishpen júginedi. Sot Bankti májbúrlep taratý týraly is qozǵaǵan kúnnen bastap Bankti ustaýǵa arnalǵan aǵymdaǵy shyǵystarmen baılanysty talaptardy jáne Qazaqstan Respýblıkasynyń zańnamasynda belgilengen ózge de jaǵdaılardy qospaǵanda, kredıtorlardyń Bankke talaptary taratý óndirisinde ǵana qoıyla alady.
Barlyq qyzyǵýshylyq tanytqan suraqtar boıynsha «Capital Bank Kazakhstan» AQ-tyń ýaqytsha ákimshiligine +7 (727) 331 66 77 telefony arqyly habarlasýǵa bolady.
Eske salsaq, Qazaqstandaǵy «Capital Bank Kazakhstan» bank lıtsenzııasynan aıyryldy.
Sonymen qatar, buǵan deıin elimizdegi «Delta Bank» jáne Tengri Bank bankterdiń lıtsenzııasy toqtatylǵan edi.