BJZQ tólem alýǵa ótinish bermegen zeınetkerlerdi izdep jatyr
Aǵymdaǵy jyly BJZQ «Azamattarǵa arnalǵan úkimet» memlekettik korporatsııasymen zeınetkerlik jasqa tolǵan, jasyna baılanysty zeınetaqy tólemderi jáne bıýdjet qarajaty esebinen memlekettik bazalyq zeınetaqy tólemi taǵaıyndalǵan, biraq zeınetaqy jınaqtaryn tóleý úshin BJZQ-ǵa ótinish bermegen adamdardyń ýákiletti organnyń halyqty áleýmettik qorǵaý salasyndaǵy aqparattyq júıesinde bar ekendigin salystyryp tekserýdi júzege asyra bastady.
Salystyryp tekserý, sondaı-aq, BJZQ-dan zeınetaqy tólemderin alý boıynsha belsendi qyzmet kórsetý úshin memlekettik derekter bazasynda tirkelgen alýshylardyń ýákiletti organda uıaly baılanys nómirleriniń bar bolýyna júrgiziletin bolady.
2018 jylǵy 11 qazannan bastap zeınetkerlik jasqa tolýǵa baılanysty biryńǵaı ótinish berýge bolatyn «bir tereze» qaǵıdaty boıynsha kompozıttik qyzmet engizilgenin eske salamyz. Onyń aıasynda zeınetkerlik jasqa tolǵan alýshy biryńǵaı ótinishpen jáne qujattar toptamasymen Memlekettik korporatsııa bólimshelerine (ıaǵnı HQO-ǵa) júginedi.
Alaıda BJZQ aqparattyq júıelerinde Qordan tólemder júzege asyrylmaıtyn 200 myńnan asa shot (200 160) bar. Bul rette zeınetkerlik jasqa jetken azamattar bıýdjetten qarajattaryn alyp jatyr. Olardyń kópshiligi zeınetker qataryna 2018 jyldyń 11 qazanyna deıin qosylǵan.
BJZQ salymshylardyń derekterin sáıkestendirý boıynsha jumystar júrgizip, 2021 jylǵy 1 sáýirden bastap Qordan tólemder júzege asyrylatyn tulǵalardyń tizimin jasaqtady. Endi osy sanatta bar adamdardyń telefon nómirlerine (ol mobıldi azamattar bazasynda tirkelýi tıis) BJZQ-dan zeınetaqy tólemderin taǵaıyndaý boıynsha belsendi qyzmet kórsetý usynylǵan sms-habarlama joldanady. Kelisim alynǵannan keıin bul azamattarǵa BJZQ-dan tólemder Memlekettik korporatsııaǵa alýshylardyń jasyna baılanysty zeınetaqy tólemderi men memlekettik bazalyq zeınetaqy tólemderin taǵaıyndaý kezinde usynǵan bank shottaryna jiberiletin bolady.
Zeınetaqy tólemderin júzege asyrý qaǵıdalarynyń erejelerine sáıkes BJZQ-dan mindetti zeınetaqy jarnalary men mindetti kásiptik zeınetaqy jarnalary esebinen zeınetaqy tólemderi aı saıyn belgilengen keste boıynsha júzege asyrylady.
Aı saıynǵy zeınetaqy tóleminiń mólsheri Qazaqstan Respýblıkasy Úkimetiniń 2013 jylǵy 2 qazandaǵy № 1042 qaýlysymen bekitilgen Zeınetaqy tólemderiniń mólsherin esepteýdi júzege asyrý ádistemesine (budan ári – Ádisteme) sáıkes eseptelgen zeınetaqy tólemderiniń jyldyq somasynyń on ekiden bir bóligi retinde aıqyndalady. Ádistemege sáıkes 2021 jyldyń 1 sáýirinen bastap zeınetaqy tólemderin júzege asyrýdyń birinshi jylyndaǵy zeınetaqy tólemderiniń jyldyq somasy zeınetaqy jınaqtary somasynyń zeınetaqy jınaqtary tólemderiniń mólsherlemesine kóbeıtindisi retinde esepteletin bolady – 6,5 %.
Odan keıingi jyldary aı saıynǵy zeınetaqy tóleminiń mólsheri ótken jylǵy aı saıynǵy zeınetaqy tóleminiń mólsherin zeınetaqy tólemderin ındeksteý mólsherlemesine jyl saıyn arttyrý jolymen qaıta esepteletin bolady – 5%.
Bul rette aı saıynǵy zeınetaqy tóleminiń eseptelgen mólsheriniń tólemi respýblıkalyq bıýdjet týraly zańda tıisti qarjy jylyna belgilengen eń tómen kúnkóris deńgeıiniń 70 paıyzynan kem emes mólsherde júzege asyrylady (2021 jyly – 24 011,40 teńge = 70% * 34 302).
Eger ótinish berilgen kúngi zeınetaqy jınaqtarynyń somasy tıisti qarjy jylyna arnalǵan respýblıkalyq bıýdjet týraly zańda belgilengen eń tómen zeınetaqynyń on eki eselengen mólsherinen aspaǵan jaǵdaıda, bul soma alýshyǵa BJZQ-dan bir ret tólenedi (2021 jyly - 519 264 teńge = 12 * 43 272).
Eger kezekti aı saıynǵy tólem júzege asyrylǵannan keıin JZSh-daǵy zeınetaqy jınaqtarynyń qaldyǵy tıisti qarjy jylyna arnalǵan respýblıkalyq bıýdjet týraly zańda belgilengen eń tómen kúnkóris deńgeıiniń 70 paıyzynan az somany quraǵan jaǵdaıda, bul qaldyq kezekti tólemniń somasymen birge tólenedi.