BJZQ aktıvteriniń 15 paıyzǵa jýyǵy qazaqstandyq bankterge ınvestıtsııalandy

ALMATY. QazAqparat - «Biryńǵaı jınaqtaýshy zeınetaqy qory» AQ aktıvteriniń 15 paıyzǵa jýyǵy qazaqstandyq bankterge ınvestıtsııa retinde jumyldyrylǵan. Sáýir aıynyń basyndaǵy ınvestıtsııalyq portfel týraly BJZQ-da aıtyp berdi, dep habarlaıdy QazAqparat tilshisi.

BJZQ baspasóz qyzmetiniń habarlaýynsha, portfeldegi negizgi úlesti - ıaǵnı, 44,89 paıyzdy Qazaqstan Respýblıkasynyń memlekettik qundy qaǵazdary quraıdy. Esep berip otyrǵan aıda olardyń aǵymdaǵy quny 112,03 mlrd teńgege ósip, 3 580,47 mlrd teńgeni quraǵan. Investıtsııalanǵan zeınetaqy aktıvteriniń mólsheri boıynsha ekinshi orynda «Qazaqstan Respýblıkasynyń ekinshi deńgeıli bankteriniń oblıgatsııalary» tur.

Olardyń portfeldegi úlesi 15,41 paıyzdyq kórsetkishte. Bul oblıgatsııalardyń aǵymdaǵy quny 1 229,20 mlrd teńgeni quraǵan. Mólsher boıynsha úshinshi orynda - «Shetel memleketteriniń memlekettik qundy qaǵazdary» qarjy tetikteri tur. Esep berip otyrǵan aıda olardyń aǵymdaǵy quny 19,15 mlrd teńgege ósip, 1 105,56 mlrd teńgege, al portfeldegi úlesi 13,86 paıyzǵa jetken.

BJZQ zeınetaqy aktıvteriniń esebinen alynǵan osy jáne ózge de qarjy ınstıýttarynyń tetikteri teńgemen (69,42%), AQSh dollarymen (30,03%) jáne reseılik rýblmen (0,45%) saqtalǵan. Investıtsııalyq portfeldiń tolyq qurylymy BJZQ-nyń resmı saıtynda berilgen.

«2018 jyldyń 1 sáýirindegi jaǵdaı boıynsha zeınetaqy aktıvteriniń 73,26 paıyzy mınımaldy táýekel deńgeıimen qarjy tetikterine salynǵan», - delingen baspasóz qyzmetiniń habarlamasynda.

Eske sala ketsek, QR Ulttyq bankiniń senimdi basqarýyndaǵy BJZQ zeınetaqy aktıvteri 2018 jyldyń 1 sáýirindegi jaǵdaı boıynsha 7,97 mlrd teńgeni quraǵan.

2018 jyldyń alǵashqy úsh aıy boıynsha ınvestıtsııalyq kiristiń mólsheri 66 mlrd teńgege jetken. Úleskerlerdiń esebine aýdarylǵan BJZQ zeınetaqy aktıvteriniń túsimdiligi jyldyq mazmunda (2017 jyldyń naýryzy men 2018 jyldyń naýryzy) 8 paıyzdy quraıdy.