Bizge kel, isker maman, bilegińdi sybanyp: PІB ákimshilik ǵımarattar dırektsııasy Astanada ótken bos oryndar jármeńkesine qatysty

<p>ASTANA. KAZINFORM &ndash; Elordada eki qolǵa bir kúrek taba almaı júrgen azamattarǵa arnalǵan bos jumys oryndary jármeńkesi jıi uıymdastyrylyp turady. Búgin Astana Polytechnic joǵary kolledji ǵımaratynda ótken is-sharaǵa 70-ten astam uıym qatysty. Olardyń qatarynda QR Prezıdentiniń Іs basqarmasyna qarasty QR Prezıdenti jáne Úkimeti ákimshiliginiń ákimshilik ǵımarattar dırektsııasy mekemesi de bar.</p>

Aıta keteıik, Dırektsııa qyzmettik ǵımarattardy paıdalanýmen, tehnıkalyq qyzmet kórsetýmen jáne QR Prezıdenti Ákimshiligi men Úkimetin jabdyqtaýmen aınalysady. 

Dırektsııanyń kadr jumysy bólimi basshysynyń orynbasary Dıas Mýhamedııardyń aıtýynsha, jármeńkede 16 mamandyq boıynsha jumys oryndary usynylǵan. Búginde dırektsııaǵa ınjener, menedjer, slesar, tasymaldaýshy, aspaz, tazalaýshy sııaqty mamandar qajet.

Foto: Vıktor Fedıýnın/ Kazinform

«Qyzmet kórsetiletin jańa nysandar paıda bolǵandyqtan kadr qajettiliginiń sezilýi zańdylyq. Bul rette, qatarymyzǵa jumysqa qabiletti, biliktiligi joǵary isker mamandardy qosqymyz keledi. Ortasha eseppen 50-60 mamandy jumyspen qamtýǵa daıynbyz. Kvazımemlekettik sektor baǵytyndaǵy mekeme bolǵandyqtan, jumyskerlerdi tolyq áleýmettik paketpen qamtamasyz etemiz», - dedi ol.

Foto: Vıktor Fedıýnın/ Kazinform

Belgili bolǵandaı, Dırektsııa jyl basynan beri 2 bos jumys oryndary jármeńkesine qatysqan. Atap aıtsaq, 26 sáýirde L. N. Gýmılev atyndaǵy Eýrazııa ulttyq ýnıversıtetiniń mansaptyq ortalyǵynyń shaqyrýymen Dırektsııa mamandary oqý ornynyń sońǵy kýrstarynyń túlekteri men stýdentteri úshin uıymdastyrylǵan jármeńkede tóbe kórsetti. Nátıjesinde 25 túıindeme ıelerimen suhbat ótkizilgen.

Foto: Vıktor Fedıýnın/ Kazinform

Al, 3 mamyrda Dırektsııa Eńbek utqyrlyǵy ortalyǵy uıymdastyrǵan bos oryndar jármeńkesine qatysty. Іs-shara barysynda 180-ge jýyq azamatty qabyldaý jáne keńes berý júzege asyrylǵan. Osylaısha, 93 azamat bos jumys oryndaryna qyzyǵýshylyq tanytyp, túıindeme ótkizgen (40 – elektrondy túrde, 53-qaǵaz túrinde). Biliktilik talaptaryna sáıkestigi jáne áńgimelesý nátıjesi boıynsha Dırektsııaǵa 25 adam jumysqa qabyldanǵanyn atap ótken jón.

Foto: Vıktor Fedıýnın/ Kazinform

Túıindeme ótkizgen azamattardyń «maǵan habarlaspaı jatyr, talapqa sáıkes kelmedim-aý» dep alańdaıtyn jóni joq. Qalǵan túıindemeler qyzmetkerlerdiń basqa jumysqa aýysýy nemese jumystan shyǵýy kezinde kezekpen qarastyrylmaq. Sondaı-aq, «Eńbek.kz» sııaqty jumys oryndary jarııalanatyn saıttardaǵy málimetter nazarǵa alynbaq.