Bizden shıkizat, sizden tehnologııa: Qazaq-koreı bıznes forýmynda 18 qujatqa qol qoıyldy
Prezıdent usynǵan pragmatıkalyq formýla
Forýmnyń ashylýynda sóz alǵan Prezıdent Qasym-Jomart Toqaev búginde Qazaqstan naryǵynda Ońtústik Koreıanyń 700-den astam kompanııasy jumys isteıtinin, olardyń qatarynda Hyundai, KIA, Samsung, LG, Doosan sekildi jahandyq korporatsııalar bar ekenin atap ótti.
Bıyl álemdik jalpy ishki ónimniń 60 paıyz ósimin Azııa beretini týraly boljamdar bar ekenin tilge tıek etken Memleket basshysy Ońtústik Koreıa «Azııanyń qaıta órleýinde» eń mańyzdy ról atqaratynyna senim bildirdi.
Qazaqstan óziniń shıkizat áleýetin ekonomıkany kúrdelendirip, joǵary tehnologııalardy meńgerýge jumsaýǵa daıyn. Forýmǵa kelgen «Tańǵy jupar eliniń» isker azamattary Prezıdent Q.Toqaevtyń sózinen osyndaı oı túıip qaıtty.
«Endi áriptestiktiń anaǵurlym keleshegi zor baǵyttary týraly paıymymyzdy tanystyrýǵa ruqsat etińizder. Birinshi — bizdiń ekonomıka úshin mańyzdy salalardaǵy kooperatsııanyń arttyrý. Bul — jer qoınaýyn paıdalaný jáne ónerkásip. Munaı-gaz salasynda bizge ońtústikkoreıalyq tehnologııanyń tolyqqandy transfertin jasap, zamanaýı qondyrǵylar men qosalqy bólshekterdiń óndirisin jolǵa qoıý mańyzdy. Bizdiń Teńiz, Qashaǵan, Qarashyǵanaq sııaqty munaı-gaz ken oryndarymyzdyń keńeıip jatqanyn eskersek, bul óte qajet», - dedi Memleket basshysy.
Qazaqstanda 5 myńǵa jýyq barlanbaı jatqan ken orny bar ekeni de aıtyldy. Astana bul ıgilik kózderin «Investıtsııalar men tehnologııalar — shıkizat ornyna» formýlasy arqyly ıgerýge nıetti.
Shyǵys Qazaqstan oblysynda lıtıı ken orny bar ekeni týraly málimetter keıingi kezde jıi aıtylyp júr. Bul jer betinde sırek kezdesetin metaldyń biri bolyp esepteledi. Al Memleket basshysynyń sózinshe, 2040 jylǵa qaraı álem boıynsha sırek metalǵa degen suranys 4 ese óspek.
«Sarapshylardyń baǵalaýynsha, 2040 jylǵa qaraı sırek metaldarǵa degen álemdik suranys 4 ese ósedi. Biz Ońtústik Koreıa úshin ekonomıkany ornyqty damytýǵa qajet shıkizat pen materıaldar jetkizý arqyly senimdi seriktes bola alamyz», - dedi Qasym-Jomart Toqaev.
Atalǵan oryndy ıgerýge koreıalyq kompanııalar da qyzyǵýshylyq tanytyp otyr.
«KIGAM, SK Esoplant sııaqty Qazaqstandaǵy lıtıı ken ornyn ıgerý arqyly joǵary ónim shyǵarýǵa qyzyǵýshylyq tanytyp otyrǵan ońtústikkoreıalyq seriktestermen áriptestikti jalǵastyrýǵa daıyn ekenimizdi bildiremiz», - dedi Memleket basshysy.
Kólik klasterinen gaz energetıkasyna deıin
Forýmda Kia kompanııasy Qazaqstandy óz zaýytyn Koreıadan tys aýmaqta zaýyt salatyn alǵashqy el retinde tańdaǵany da aıtyldy. Q.Toqaev muny avtomobıl qurastyrý salasyndaǵy ózara tıimdi ónerkásip kooperatsııasy dep baǵalady.
«Qazirdiń ózinde Qazaqstanda Hyundai markaly avtomobılder tabysty qurastyrylyp jatyr. Kelesi jyly ınvestıtsııa kólemi 200 mln dollar bolatyn, tolyq tizbekti Kia zaýytynyń iske qosylǵanyn kútip otyrmyz», - dedi Prezıdent.
Koreıalyq kólikterdiń bólshekteri de Qazaqstanda óndirilýi múmkin. Sejong, EHWA, Yongsan, Motrex kompanııalary bizdiń elde avtobólshek óndirisiniń klasterin qurýdy josparlap otyr.
Ońtústik Koreıa dese eske áýeli Samsung bastaǵan turmystyq tehnıka óndirýshiler, zamanaýı avtokólikter men K-pop negizindegi kreatıvti ındýstrııa túsedi. Qazaq-koreı yqpaldastyǵy bulardan ári asyp, energetıka baǵytyna da oıysatyn túri bar. Naqtyraq aıtsaq, Doosan Enerbility kompanııasynyń Túrkistan jáne Atyraý oblystarynda gaz elektr stansasyn salmaqshy.
«Jahanda energetıka kózderiniń aýysyp jatqanyna baılanysty jasyl energetıka salasynda áriptestik aıasyn keńeıtý barǵan saıyn ózekti bolyp keledi. Búginde Qazaqstannyń balamaly energetıka salasyndaǵy aıtarlyqtaı áleýeti kóptegen jahandyq oıynshylardyń nazaryn aýdaryp otyr. Ońtústikkoreıalyq kompanııalarmen osy baǵyttaǵy yqpaldastyq tájirıbe almasýdan naqty jobalardy iske asyrýǵa, tehnologııalar transfertine deıin josparly túrde keńeıtiletinine úmittenemiz», - dedi Memleket basshysy.
«Aqyldy ferma» jáne «aqyldy qala»
Qasym-Jomart Toqaev koreıalyq áriptesi Qazaqstannyń agroónerkásip keshenine «aqyldy ferma» tehnologııasyn engizýdi usynǵanyn aıtady. Prezıdent bul tehnologııany bizdegi jylyjaılarǵa paıdalanýǵa bolady dep otyr.
«Búgingi kelissóz barysynda Koreıa Respýblıkasynyń Prezıdenti Qazaqstandy «aqyldy aýylsharýashylyq fermalar» qaǵıdasyna negizdelgen tehnologııamen qamtamasyz etý jóninde usynys jasady. Meniń oıymsha, bul — óte jaqsy usynys jáne biz osy jobany júzege asyrýmen aınalysamyz. Ońtústik Koreıanyń aýyl sharýashylyǵyndaǵy jasandy zeıinge, robot tehnıkasy men bıotehnologııaǵa negizdelgen ınnovatsııalyq tehnologııalaryn engizýge asa múddelimiz. Ásirese tıimdiligi joǵary, «aqyldy» jylyjaı salý tájirıbesi bizdiń fermerlerdiń arasynda suranysqa ıe», - dedi Prezıdent.
«Aqyldy» tehnologııa aýyl sharýashylyǵynyń ónimdiligin arttyrsa, qaladaǵy turmysty jaıla ete túsedi. Sıngapýrmen birlesken joba aıasynda Alatau City aqyldy qalasy irge jaıatynyn aıtqan Prezıdent Q.Toqaev koreıalyq developerler de osy jobaǵa atsalyssa degen usynys bildirdi.
«Biz Sıngapýr kompanııalarymen seriktese otyryp aýmaǵy arnaıy ekonomıkalyq aımaqqa jatqyzylǵan Alatau City atty jańa „aqyldy qala“ salýǵa kiristik. Ońtústik Koreıa ınvestorlary men developer kompanııalar osy bastamaǵa belsendi úles qosady dep úmittenemiz», - dedi Memleket basshysy.
Al Prezıdent ıÝn Sok El Qazaqstan Ońtústik Koreıa úshin Ortalyq Azııadaǵy eń iri serikteskeaınalǵanyn atap ótti.
«Al Koreıa Qazaqstannyń saýda seriktesteriniń alǵashqy tórttigine kirip otyr. Qazaqstandyq satyp alyp jatqan avtomobılderdiń 1/3 bóligi koreıalyq markanyń ónimderi. Qazasqtannan bizge ımporttalatyn shıki munaı men ýran Koreıanyń energetıkalyq qaýipsizdigin nyǵaıtýda mańyzdy ról atqarady. Qurmetti eki eldiń kásipkerleri! Bizdiń ónerkásip qurylymymyz bir-birin tolyqtyra alady. Bir-birimiz úshin eń qajetti seriktes retinde ekonomıkalyq áriptestiktiń kókjıegin keńete túsýimiz kerek», - dedi Koreıa basshysy.
Forým aıasynda jalpy quny 432,5 mln dollar bolatyn 25 qujatqa qol qoıyldy. Onyń 18-i kommertsııalyq qujat.