Bizde kólik júrgizý mádenıeti tómen – Álıhan Smaıylov

<p>Jol qaýipsizdigi úshin jaýapkershiliktiń artýyna qaramastan jol júrý erejesin buzatyndar tabylyp jatyr, dep habarlaıdy <a href="https://kaz.inform.kz/" target="_blank" rel="noopener">QazAqparat</a> tilshisi.</p>

«Bıyl statıstıkalyq derekter boıynsha jol-kólik oqıǵalary men zardap shekkenderdiń sany birshama tómendegen. Degenmen, áli de elimizdiń kúre joldarynda kúnine orta eseppen 5-6 adam qaza tabady. Ár tsıfrdyń artynda qanshama jannyń ómiri men densaýlyǵy tur. Ókinishke qaraı, bizde kólik júrgizý mádenıeti men tártip deńgeıi tómen. Biz joldaǵy quqyq buzýshylyqtar úshin qylmystyq jáne ákimshilik jaýapkershilikti qatańdatyp kelemiz», - dedi Álıhan Smaıylov Úkimet otyrysynda.

Úkimet basshysynyń aıtýynsha, polıtseıler mas júrgizýshilermen kúresip, myńdaǵan adam kólik júrgizý quqyǵynan aırylady.

«Árıne, mundaı zań buzýshylarǵa barynsha qatań shara qoldaný kerek. Joldaǵy qozǵalys qaýipsizdigin baqylaý júıesindegi jaǵdaı da máz emes. Beınekameralar men basqa da tehnıkalyq quraldardy tolyq paıdalaný múmkin bolmaı otyr. Keı jerlerde olar jetispeı jatsa, keı jerde múldem jumys istemeıdi. Eldi mekenderdegi kameralar sanyn kóbeıtken jón, al respýblıkalyq mańyzy bar avtojoldarda apparattyq-baǵdarlamalyq keshenderdi belsendi paıdalaný kerek», - deıdi ol.