Togo Ulttyq Assambleıasymen dıalog ornatýǵa múddelimiz - Máýlen Áshimbaev

<p>Senat Tóraǵasy Máýlen Áshimbaev Togo Respýblıkasynyń Prezıdenti For Essozımna Gnassıngbemen kezdesti, dep habarlaıdy <a href="https://kaz.inform.kz/" target="_blank" rel="noopener">Kazinform</a> QR Parlamenti Senatynyń baspasóz qyzmetine silteme jasap.</p>

Kezdesý barysynda eki eldiń yntymaqtastyǵyn damytý jáne parlamentaralyq qarym-qatynasty keńeıtý máseleleri talqylandy.

Palata Spıkeri Togo Respýblıkasy Qazaqstannyń Batys Afrıkadaǵy mańyzdy jáne perspektıvaly seriktesteriniń biri ekenin atap ótti. Sondaı-aq ol parlamentaralyq deńgeıde, onyń ishinde halyqaralyq uıymdar aıasynda ózara baılanysty nyǵaıtýdyń máni zor ekenine nazar aýdardy.

«Ekijaqty qarym-qatynasymyzda parlamentaralyq yntymaqtastyq mańyzdy ról atqarady. Biz Togo Ulttyq Assambleıasymen dıalog ornatýǵa múddelimiz. Zań shyǵarý organdarynda tıisti Dostyq toptaryn qurý – osy baǵyttaǵy alǵashqy qadam bolary anyq. Depýtattarymyzdyń Parlamentaralyq Odaq jáne basqa da halyqaralyq alańdar arqyly baılanys ornatýǵa mol múmkindikteri bar. Sizdiń Qazaqstanǵa saparyńyz eki eldiń parlamentaralyq yntymaqtastyǵyn damytýdyń negizin qalaıdy dep senemin», – dedi Máýlen Áshimbaev.

Kezdesý kezinde taraptar halyqaralyq jáne óńirlik kún tártibindegi máselelerge de toqtaldy.

Sonymen qatar Senat Spıkeri elimizde Memleket basshysynyń bastamasymen qolǵa alynǵan reformalardy iske asyrý jolynda Palata atqaryp otyrǵan zań shyǵarý jumysyna nazar aýdardy.

Óz kezeginde Togo Respýblıkasynyń Prezıdenti For Essozımna Gnassıngbe Qazaqstanda júrgizilip jatqan reformalardy joǵary baǵalap, barlyq baǵyt boıynsha yntymaqtastyqty odan ári nyǵaıtýǵa jáne keńeıtýge múddeli ekenin jetkizdi.