Biz Qazaqstanda týdyq, qazaqsha ómir súrip, qazaqsha oılanamyz - Ramıla Mýstafaeva

<p>TÚRKІSTAN. KAZINFORM &ndash; Oblystyq &laquo;Garabah&raquo; ázerbaıjan etnomádenı birlestigi&raquo; qoǵamdyq birlestiginiń tóraǵasy Ramıla Mýstafaeva qıyn qystaý zamanda ázerbaıjan halqyn jatsynbaı baýyryna basqan qazaq halqyna alǵys aıtty.</p>

Ramıla Mýstafaevanyń atalary 1937 jyly saıası jaǵdaılarǵa baılanysty Taýly Qarabaqtan Sozaq jerine kóship kelgen. Anasy Teriskeı topyraǵynda týǵan. Degenmen, sol kezdegi eki jasar búldirshindi on bir balanyń ishinen tańdap, Qarabaqqa qaıta alyp ketipti. Al, keıin eseıip, otbasyly bolǵan soń, 1976 jyly týǵan jeri Qazaqstanǵa túbegeıli qonys aýdardy.

«Ekinshi dúnıejúzilik soǵysqa qatysyp, ǵasyr jasap otyrǵan naǵashy atam áli kúnge deıin bizge sol sátti kózine jas alyp aıtyp otyrady. Alǵashqyda barlyǵymyzdy bul elge óltirý úshin ákele jatyr dep oılaǵan eken. Birneshe kúnge sozylǵan aýyr sapardan tiri qalǵandardy Sozaq aýdanynyń qazirgi ortalyǵyna jetkizgen. Ol kezde atam 13 jasta bolǵan. Biraq, qazaq halqy jylyshyraı tanytyp, ystyq shaı men tamaq usynypty. Bir úıde úsh kún qonaq bolyp, keıinnen úıdi-úıge bólinip qonystanǵan. Arada ýaqyt óte kele qazaq halqy bárimizdiń baspanaly bolýymyzǵa járdemdesti. Óltiredi dep oılaǵan qazaqtardyń bizdi óz baýyryndaı kórgeni jadymyzdan máńgi óshpeıdi», deıdi ol.

Ramıla Mýstafaeva Saıram aýdany ákimdiginde on jylǵa jýyq qyzmet etken. Ujymmen áli kúnge deıin tyǵyz qarym-qatynasta. Qazaqstanda dostary da kóp.

«Qazir biz atamekenimiz – Ázerbaıjanǵa barsaq, bir apta óter-ótpes Qazaqstanǵa qaıtqymyz kelip turady. Tipti, ol jaqtaǵy halyqtyń keıbir sózderin túsinbeı qalatyn jaǵdaılar da kezdesedi. Tirshiligine de úırene almaımyz. Óıtkeni, biz Qazaqstanda týdyq, osy eldiń tárbıesin sińirdik, osy elde ósip-óndik jáne eń bastysy, biz qazaqsha oılanamyz. Tipti, ázerbaıjandarǵa qaraǵanda qazaq dostarym kóp. Taǵy bir aıta keterligi, anamnyń ápke-sińlileri qazaq, grýzın, ázerbaıjan, túrik, tájik, endi biri sheshenge turmysqa shyqqan. Sanap kórsem, bizdiń áýletimizde segiz túrli ult ókili bar eken. Barshamyz bir atanyń balalaryndaı tatý tátti turyp jatyrmyz. Osy oraıda, árbir ultty jatsynbaı, tirshiligin alańsyz jasaýyna múmkindik bergen, bizdi baýyryndaı kórgen darhan kóńildi qazaq halqyna alǵys aıtamyn!» - deıdi Ramıla Mýstafaeva.