Biz qaıda barsaq ta qazy-qarta, qurt-maıymyzdy ala baramyz – Myrzaǵalı Aıtjanov

<p>ASTANA. KAZINFORM &mdash; Bokstan Qazaqstan ulttyq quramasynyń bas bapkeri Myrzaǵalı Aıtjanov shetelge jarystarǵa shyqqanda ózderimen birge qazaqtyń qandaı ulttyq taǵamdaryn ala baratynyn aıtyp berdi.</p>

Esterińizde bolsa, Myrzaǵalı Aıtjanov osyǵan deıin Parıjge aman-esen jetkenin, búgin Olımpıada qalashyǵyndaǵy alǵashqy jattyǵýlaryn bastaıtynyn aıtyp bergen edi.

«Parıjden alǵashqy as-sýymyzdy ishtik. Taǵamdary unady. Óz basym osymen Olımpıada oıyndaryna besinshi ret sportshylarymyzdy bastap kelip otyrymyn. Olımpıadadan tys ózge de, qanshama jarystarǵa shyǵyp jatyrmyz. Barlyǵynda ózimizben birge qazaqı qazy-qarta, qurt-maıymyzdy ala baramyz. Biz qaıda júrsek te, bir kún et jemeı qalsaq, qarynymyz ashady. Sebebi – qazaqpyz ǵoı. Et jemegen qazaq – qazaq emes», - dedi bas bapker.

Aıta keteıik, Parıj Olımpıadasyna bokstan erler quramasy tolyq quramda, ıaǵnı 7 salmaqta, al áıelder quramasy 3 salmaqta synǵa túsedi.

Erlerden Sáken Bıbosynov, Mahmud Sabyrhan, Muhammedsabyr Bazarbaıuly, Aslanbek Shymbergenov, egiz boksshylar — Nurbek Oralbaı men Aıbek Oralbaı jáne Qamshybek Qońqabaev el namysyn qorǵasa, áıelderden Nazym Qyzaıbaı, Karına Ibragımova jáne Valentına Halzova sharshy alańǵa shyǵady.

Esterińizge sala keteıik, qazirgi tańda tórtjyldyq dodaǵa joldama jeńip alǵan qazaqstandyq sportshylarymyzdyń alǵashqy legi Parıjdegi olımpıadalyq qalashyqqa baryp úlgerdi.

Qazaqstan quramasy Olımpıada oıyndaryna sporttyń 25 túrinen 92 joldama jeńip aldy.

Frantsııa astanasy Parıj qalasynda ótetin XXXIII jazǵy Olımpıada oıyndary 26 shilde men 11 tamyz aralyǵynda ótedi.