Biz qaqqan dabyldy «ıslam dinine qarsy shyqty» dep áldekimder óńin aınaldyryp, dabyra salyp júr - Bapı

<p>Búgin Májilistiń jalpy otyrysynda depýtat Ermurat Bapı jat dinı aǵymdarǵa tosqaýyl qoıý máselesin kóterdi, dep habarlaıdy <a href="https://kaz.inform.kz/" target="_blank" rel="noopener">Kazinform</a>.&nbsp;</p>

«Biz memleketimizdiń ulttyq tutastyǵy men halqymyzdyń dástúrli dinin, urpaǵymyzdyń bolashaǵyn qaterge baılap bere almaımyz. Ulttyq qadir-qasıetimizdi saqtaımyz desek, eldiń ishine iritki salǵan jat dinı aǵymdy aqyl-sanadan da, aýyl-qaladan da qýyp shyǵýǵa mindettimiz. Biraq depýtattar qaqqan dabyldy «bular ıslam dinine qarsy shyqty» dep áldekimder áleýmettik jelide óńin aınaldyryp, dabyra salyp júr. Eskerte keteıin, jalpy ıslamǵa jáne eldegi ıslamnyń Hanafı mazhabyna qarsy emespiz. Biz dástúrli dinge búıi tıgendeı bolǵan salafızm, ýahabızm ıdeıasyna qarsymyz. Qazaq halqynyń ejelden ómir súrý jáne turmysy men salt-dástúrine jat ıdeologııalyq aǵymǵa qarsy Úkimet jaǵynan jasalǵan kontseptsııalyq baǵdarlamalar bar ma?», - dep surady E. Bapı.

Óz kezeginde Premer-Mınıstrdiń orynbasary Tamara Dúısenova osy másele Úkimette qaralyp jatqanyn aıtty.

«2011 jyly dinı qyzmet jáne dinı birlestikter týraly zań qabyldanǵan. Sol zańdy oryndaý úshin keıingi 5 jylda úsh kontseptýaldy qujat qolǵa alyndy. Qazir ózińiz kótergen taqyryp úlken problemaǵa aınalyp otyr. Tamyz aıynan bastap osy máselemen aınalysyp jatyrmyn. Biraz teologtardy, dinı birlestik ókilderin shaqyryp, pikir almastyq. Olardyń pikiri de depýtattar kótergen máselemen sáıkes kelip tur. Sizderdiń usynystaryńyzdy olar da qoldap otyr», - dedi Úkimet basshynyń orynbasary.

Onyń sózine qaraǵanda, áleýmettik jelilerdegi túrli aǵymdardy nasıhattaıtyn kontentke tolyq tosqaýyl qoıý múmkin bolmaı tur.

«Kóp máseleni zańdy túrde retteýimiz kerek. Sondyqtan depýtattardyń usynystaryn qoldaı otyryp, zańǵa ózgeris engizý qajet», - dedi T. Dúısenova.

Buǵan deıin habarlanǵandaı, depýtattar dinı teris aǵymdarǵa zańmen qatań tyıym salý máselesin kótergen edi.