Bıýdjettiń derbes kirisi aýyldy damytý úshin jetkiliksiz – Ulttyq ekonomıka vıtse-mınıstri
«Jergilikti ózin-ózi basqarýdaǵy eń ózekti másele - aýyl bıýdjetiniń kiris kózderin keńeıtý. Búginde bıýdjettiń IV deńgeıdegi kirister 8 túrli salyq túsiminen, túrli tólemnen, aıyppuldardyń jáne aýdandyq bıýdjetten beriletin transfertterden qalyptasady. Bıýdjettiń IV deńgeıi engizilgen sátten bastap túsimder dınamıkasy 2 ese ulǵaıdy. Máselen, 2023 jyldyń qorytyndysy boıynsha IV deńgeıdegi bıýdjetke 308 mlrd teńge josparlansa, is júzinde 320 mlrd teńge tústi, osylaısha jospar 103,8%-ǵa artyǵymen oryndaldy. Onyń ishinde óz tabysy 53 mlrd teńge josparlansa, is júzinde 68 mlrd teńge tústi. Ózin-ózi qamtamasyz etý úlesi 21,2%-ǵa jetti», - dedi Baýyrjan Omarbekov Májilis janyndaǵy qoǵamdyq palata otyrysynda.
Degenmen vıtse-mınıstrdiń málimdeýinshe, bul kórsetkishter aýyldardy damytý úshin jetkiliksiz.
Osy oraıda Ulttyq ekonomıka mınıstrligi aýyl bıýdjetiniń ózin-ózi qamtamasyz etýin ulǵaıtýdy usynyp otyr, ol úshin:
- máslıhatty bólý boıynsha zańdy tulǵalar men jeke kásipkerlerdiń múlik salyǵynyń úlesin bólý;
- sý resýrstaryn paıdalanǵany úshin tólemaqy;
- jekelegen qyzmet túrlerimen aınalysý quqyǵy úshin lıtsenzııalyq alym;
- jekelegen qyzmet túrlerimen aınalysýǵa lıtsenzııalardy paıdalanǵany úshin tólemaqy.
«Sonymen qatar jańa bıýdjet kodeksiniń jobasy sheńberinde paıdaly qazbalardy óndirý salyǵyn bıýdjettiń IV deńgeıine berý josparlanyp otyr. Osylaısha, IV deńgeıdiń menshikti kirister 4 ese artýy kútiledi. Jalpy aýyl bıýdjetiniń kiris kózderin keńeıtý jónindegi jumys jalǵasady», - deıdi mınıstrdiń orynbasary.
Buǵan deıin saılanǵan aýyl ákimderiniń qyzmetine, atap aıtqanda saılaýaldy baǵdarlamalaryn oryndaý, halyqpen eseptik kezdesýler ótkizý, sondaı-aq áleýmettik jelilerde qyzmetti jarııalaý bóliginde monıtorıng júrgiziletini týraly habarlaǵan edik.