Bıýdjettiń tıimsiz ıgerilýi boıynsha 100-den astam memlekettik qyzmetshi jazalandy

ASTANA. QazAqparat – Byltyr bıýdjet qarajatyn tıimsiz paıdalaný somasy 421 mlrd teńge boldy. Bul týraly Májiliste 2022 jylǵy respýblıkalyq bıýdjettiń atqarylýy týraly Úkimettiń esebin tanystyrǵan Premer-Mınıstrdiń orynbasary - Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«2022 jyly bıýdjet qarajatyn tıimsiz paıdalaný somasy 421 mlrd teńge nemese jalpy shyǵystar kóleminiń 2,3 paıyzy boldy. Bıýdjet qarajatyn tıimdi jáne tolyq ıgerýde ákimshilerdiń jaýapkershiligin arttyrý úshin sharalar qabyldandy. Bul turǵyda ortalyq jáne jergilikti atqarýshy organdarǵa qatysty. Byltyrdyń qorytyndysy boıynsha ortalyq jáne jergilikti atqarýshy organdardan 113 qyzmetker tártiptik jaýapkershilikke tartyldy, onyń ishinde 82 adam basshylyq qyzmette júrgender», - dedi E. Jamaýbaev.

Budan buryn habarlanǵandaı, E. Jamaýbaev byltyr respýblıkalyq bıýdjet kiristeri 101,9%-ǵa atqarylǵanyn aıtty.

Qarjy mınıstri byltyr bıýdjet qarajatynan 81 mlrd teńge ne sebepti ıgerilmegenin túsindirdi.