Bıýdjettiń IV deńgeıindegi memlekettik satyp alý rásimderi jeńildetilmek

ASTANA. QazAqparat – Bıýdjettiń IV deńgeıi úshin memlekettik satyp alý rásimderin jeńildetý jónindegi normalar qarastyrylyp otyr. Bul týraly Májiliste «Qazaqstandaǵy jergilikti ózin-ózi basqarý týraly» zań jobasyn tanystyrý kezinde Ulttyq ekonomıka vıtse-mınıstri Baýyrjan Omarbekov aıtty, dep habarlaıdy QazAqparat tilshisi.

«Zań jobasynda bıýdjettiń IV deńgeıi úshin memlekettik satyp alý rásimderin jeńildetý jónindegi normalar eskerilgen. Osy oraıda, Qarjy mınıstrligindegi áriptesterimiz bul máseleni zańǵa táýeldi aktiler deńgeıinde retteýdi jáne aýyl bıýdjeti úshin memlekettik satyp alýdy júzege asyrýdyń jekelegen qaǵıdalaryn ázirleýdi usyndy», - B. Omarbekov.

Sonymen, memlekettik satyp alýdyń kelesi túrleri usynylyp otyr:

- bir kózden 2 000 AEK-ke deıin satyp alý;

- konkýrs negizinde – 2 000 AEK-ten joǵary;

- baǵa usynystaryn suratý arqyly 8 000 AEK-ke deıingi memlekettik satyp alýlar.

«Sondaı-aq, memlekettik satyp alýdy ótkizýdiń ózge de tásilderin ákim apparatynyń qaraýyna saqtaý usynyldy», - dedi vıtse-mınıstr.

Budan buryn habarlanǵandaı, búgin Májiliste tanystyrylǵan zań jobasy aıasynda Qazaqstanda aýyldyq okrýg keńesterin qurý josparlanyp otyr.

Budan bólek, aýyl ákimi men onyń apparatyna qosymsha fýnktsııalar berilmek.