Bıýdjettiń ashyqtyǵy jaǵynan ShQO men Pavlodar oblystary kósh bastady

  ASTANA. QazAqparat - «Zertteu Research Institute» Qoǵamdyq qory dırektorynyń orynbasary Qýanysh Ońalbaev jergilikti bıýdjetterdiń ashyqtyǵyn zertteý jumysynyń nátıjesimen tanystyrdy, dep habarlaıdy QazAqparat tilshisi.

«Eki jyl saıyn Qazaqstannyń ulttyq bıýdjet jelisi «Soros Qazaqstan» qorynyń qarjylandyrýymen jergilikti bıýdjetterdiń ashyqtyǵyna baǵalaý júrgizedi. Bul rette zertteý jumysyna halyqaralyq standarttar negiz bolyp otyr. Osy ındeks boıynsha, Qazaqstanda qazirgi tańda 53 upaı bar. 2008 jyldan bastap kestege qarasańyz, elimizde aıtarlyqtaı ilgerileýshilik baryn kórýge bolady. ıAǵnı, osydan on jyl buryn 35 upaıdan kórsetkishimizdi 53 upaıǵa deıin jetkizdik. Ortalyq Azııa jáne postkeńestiń eldermen salystyrǵanda Grýzııa men Reseıdiń bıýdjetiniń ashyqtyǵy joǵary kórsetkishke ıe. Biz óz zertteýimizde osy ındekstiń ádistemesine súıene otyryp, jergilikti bıýdjettiń ashyqtyǵyna taldaý jasadyq», - deıdi Qýanysh Ońalbaev Astanada ótip jatqan «Memlekettiń ashyqtyǵy men eseptiligi - jemqorlyqqa qarsy qazirgi saıasattyń negizi» atty suhbat alańynda.

Onyń aıtýyna qaraǵanda, árbir óńirde 60 suraqtan turatyn anketany toltyratyn sarapshy bar. Sonymen birge, álgi sarapshy bıýdjettik protsestiń barlyq tórt satysy (josparlaý, bekitý, oryndaý jáne esep) boıynsha aqparattyń ashyqtyǵy tekseredi.

«2017 jylǵy kórsetkish mynadaı: Bıýdjettiń ashyqtyǵy boıynsha kóshbasshy - Shyǵys Qazaqstan, Pavlodar jáne Aqmola oblystary. Shyǵys Qazaqstanda bıýdjettik aqparattyń ashyqtyǵy joǵarǵy kórsetkishke ıe bolsa, eń tómengi nátıjeni 100 upaıdyń 18-in ıelengen Almaty oblysy kórsetti», - deıdi ol.

Qýanysh Ońalbaev sonymen qatar, bıýdjetti ıgerý satysynyń qaısysy eń jabyq sıpatqa ıe ekenin atapa ótti.

«Eń jabyq saty - bıýdjettiń josparlaý satysy. Demek, tek Shyǵys Qazaqstan ǵana bıýdjet jobasyn máslıhatqa shyǵarmaı turyp, jarııa etken. Dınamıkany salystyrar bolsaq, 2015 jyldan qaraǵanda Almaty oblysy óz kórsetkishin 26 upaıǵa tómendetken. Al Pavlodar oblysy 22 upaılyq ósimdi kórsetken. Biz óńir ákimderine bıýdjet jobasyn jarııa etip, jobany talqylaýǵa keńes berer edik», - dedi Qýanysh Ońalbaev.

Sarapshy óz sózinde osy taldaý jumystary saıttardy zertteý arqyly júrgizilgenin atap ótti.

«Eger osy zertteýdiń jumysymen kelispeıtin bolsa, kez kelgen adam saıtqa ótip, tıisti aqparatyn kórsetýine bolady. Biz túzeıtin jerde túzeımiz», - dep túıdi ol.

Eske sala ketsek, atalmysh suhbat alańynda QR Memlekettik qyzmet isteri jáne sybaılas jemqorlyqqa qarsy is-qımyl agentigi tóraǵasynyń orynbasary Oljas Bektenov Qazaqstanda aldaǵy eki jylda halyqqa kórsetiletin memlekettik qyzmetterdiń 90 paıyzy elektrondy formatqa kóshiriletinin habarlaǵan edi.