Bıýdjettiń 88 mlrd teńgesi ıgerilmeı qaldy – Qarjy mınıstri

ASTANA. QazAqparat – Qarjy mınıstri Erulan Jamaýbaev jyl basynan bıýdjettiń 88 mlrd teńgesi nelikten ıgerilmeı qalǵanyn túsindirdi, dep habarlaıdy QazAqparat tilshisi.

«Memlekettik bıýdjettiń shyǵystary 98,5%, respýblıkalyq bıýdjettiń shyǵystary – 98,8%, jergilikti bıýdjetterdiń shyǵystary 98,9% atqaryldy. Respýblıkalyq bıýdjet boıynsha somasy 9 trln teńgege shyǵystar júrgizildi», - dedi Erulan Jamaýbaev búgingi Úkimet otyrysynda.

Sondaı-aq 109 mlrd teńgesi atqarylmaǵan, onyń ishinde 21 mlrd teńge – únemdelse, 88 mlrd teńge ıgerilmeı qalǵan.

«Igerilmeýdiń negizgi sebepteri: konkýrstyq rásimderdiń uzaq júrgizilýi; sharttardy, qosymsha kelisimderdi jasaý rásimderiniń uzaq júrgizilýi, bıýdjettik baǵdarlamalardy (kishi baǵdarlamalardy) iske asyrý jónindegi normatıvtik quqyqtyq aktilerdiń ýaqtyly qabyldanbaýy; oryndalǵan jumys aktileriniń, shot-faktýralardyń ýaqytyly usynylmaýy; esepti aıda qarajatty jumsaý qajettiliginiń bolmaýy», - dep túsindirdi Qarjy mınıstri.

Al jergilikti bıýdjetterdiń shyǵystary 4,4 trln teńgeni qurady. Onda 47 mlrd teńge jumsalmaǵan.

«Bıyl óńirlerge 2 trln teńgege jýyq nysanaly transfertter kózdelgen. Olarǵa 1 maýsymǵa 641 mlrd teńge bólingen jáne 97,8% ıgerilgen. Igerilmeı qalǵan soma – 14 mlrd teńge. Bul ásirese Astana qalasynda, Qaraǵandy, Jambyl jáne Almaty oblystarynda baıqaldy», - dedi Erulan Jamaýbaev.

Aıta keteıik, jyl basynan respýblıkalyq bıýdjet túsimi azaıyp, jergilikti bıýdjet kiristeri artqan.