Bıýdjettiń 81 mlrd teńgesi ıgerilmegen, qarjy mınıstri sebebin túsindirdi
«Qabyldanǵan salyq salasyndaǵy jáne kedendik ákimshilendirý sharalarynyń nátıjeleri boıynsha salyq boıynsha tekserýlerdiń tıimdiligi 3,2 esege, kedendik tekserýlerdiń tıimdiligi 7 esege ulǵaıdy. Sondaı-aq, jer qoınaýyn paıdalanýshylar boıynsha kameraldyq baqylaý aıasynda qosymsha 104 mlrd teńge óndirilip alyndy. Іri salyq tóleýshilerge, onyń ishinde jer qoınaýyn paıdalanýshylarǵa qatysty salyq boıynsha 62 tekserý aıaqtaldy. Bul turǵyda bıýdjetke shamamen 120 mlrd teńge qosymsha tústi», - dedi E. Jamaýbaev.
Sonymen qatar, ol byltyr bıýdjet shyǵystary 98,6%-ǵa atqarylǵanyn jáne 18,5 trln teńge bolǵanyn eske saldy. 262 mlrd teńge somasyndaǵy qarajat boıynsha mindetter atqarylmaǵan.
«Onyń ishinde 181 mlrd teńge – Úkimet rezervi boıynsha únemdelgen aqsha jáne ózge de únemdeý. Bıýdjet kodeksine sáıkes, bul shyǵystar ıgerilmegen dep eseptelmeıdi. Sondyqtan, taza ıgerý 99,6% dep aıtýǵa bolady. Igerilmegeni – 81 mlrd teńge. Igerilmeýdiń negizgi sebepteri: ónim berýshilerdiń shart talaptaryn buzýy, jobalaý-smetalyq qujattamaǵa memlekettik saraptamanyń uzaq ótýi nemese oń qorytyndysynyń bolmaýy, oryndalǵan jumystar aktileriniń, shot-faktýralardyń ýaqtyly usynylmaýy», - dedi mınıstr.
Aıtýynsha, jyl sońynda respýblıkalyq bıýdjette eleýli kassalyq qaldyq qalyptasqan.
«Bıýdjet zańnamasyna sáıkes, bul qarajat kelesi jylǵa ótkendikten, osy qaldyqtar esebinen bıylǵy bıýdjetti qarjylandyrýǵa múmkindik aldyq. Jalpy, respýblıkalyq bıýdjetten 39 memlekettik organ qarjylandyryldy, olar boıynsha 2 054 tikeleı nátıje kórsetkishi jáne 474 túpkilikti nátıje kórsetkishi bekitilgen bolatyn. Bıýdjetti atqarý nátıjesinde kórsetkishterdiń shamamen 90 paıyzyna qol jetkizildi», - dedi vedomstvo basshysy.
Budan buryn habarlanǵandaı, E. Jamaýbaev byltyr respýblıkalyq bıýdjet kiristeri 101,9%-ǵa atqarylǵanyn aıtty.