Bıýdjettik josparlaý protsesterin avtomattandyrý aıaqtalady – Qarjy mınıstrligi

NUR-SULTAN. QazAqparat – Strategııalyq josparlardyń 261 ındıkatoryna qol jetkizildi. Bul týraly Májilistiń jalpy otyrysynda QR Úkimetiniń 2020 jylǵy respýblıkalyq bıýdjettiń atqarylýy týraly esebin talqylaý kezinde QR Qarjy mınıstri Erulan Jamaýbaev málim etti, dep habarlaıdy QazAqparat tilshisi.

«2020 jyly bıýdjet shyǵystary 351 bıýdjettik baǵdarlama aıasynda 63 strategııalyq baǵyt boıynsha jumsaldy. Strategııalyq josparlardyń 261 ındıkatoryna qol jetkizildi. Qarajattyń edáýir bóligi 13 memlekettik baǵdarlamany qarjylandyrýǵa baǵyttaldy. Atap aıtqanda, «Nurly jol» memlekettik baǵdarlamasy esebinen tranzıttik júk kólemi 2019 jylmen salystyrǵanda 20 paıyzdan astam ósip, 23,5 mln tonnaǵa jetti. «Nurly jer» boıynsha 15,3 mln sharshy metr turǵyn úı paıdalanýǵa berildi. Indýstrııalyq-ınnovatsııalyq damý memlekettik baǵdarlamasy boıynsha 105 myńǵa jýyq jumys orny saqtaldy jáne ashyldy. Agroónerkásiptik keshen memlekettik baǵdarlamasy boıynsha 29 myńnan astam joba ınvestıtsııalyq sýbsıdııalaýmen qamtyldy», - dedi E. Jamaýbaev.

Onyń sózine qaraǵanda, Esep komıteti memlekettik josparlaý júıesindegi, bıýdjet qarajatyn paıdalanýdyń tıimdiligi jóninde birqatar máselelerdi atap ótti. Olar jumys toptarynda da talqylandy.

«Memlekettik josparlaý júıesin odan ári jetildirý aǵymdaǵy jyly qabyldanǵan Memlekettik basqarýdy damytý tujyrymdamasyna sáıkes kezeń-kezeńimen júzege asyrylatyn bolady. Bıýdjettik josparlaý protsesterin avtomattandyrý aıaqtalatyn bolady. Memlekettik organdardyń strategııalyq josparlarynda kórsetkishter qarjy shyǵystarymen ózara baılanysty makroındıkatorlar men ındıkatorlarǵa bólinetin bolady. Sizderdiń qaraýlaryńyzǵa engizilgen bıýdjet zańnamasyn jetildirý jónindegi zań jobasynda úshinshi toqsannan keıin memlekettik organdardyń strategııalyq josparlarynyń nysanaly ındıkatorlarynyń mánderin túzetýge tyıym salý usynylady», - dedi mınıstr.