Bıýdjettik salada kimniń jalaqysy ósedi

ASTANA. QazAqparat - QR Ulttyq ekonomıka mınıstri Rýslan Dálenov jalaqysy tómen bıýdjettik sala qyzmetkerleriniń aılyǵyn 30 protsentke kóterýge qatysty esep-qısapty jarııalady, dep xabarlaıdy QazAqparat tilshisi.

Mınıstrdiń aıtýynsha, atalǵan sharalarmen jalpy respýblıka boıynsha 643 407 qyzmetker qamtylady.

«Olar - áleýmettik jumyskerler, kitapxanashylar, ormanshylar, veterınar dárigerler, is júrgizýshiler, aýla sypyrýshylary, texnıkalyq personal jáne taǵy basqa qyzmetkerler. Mysaly, ortasha jalaqy 69 myń teńgeni qurasa, endi ol 90 myń teńgeni quraıdy. Ol úshin qosymsha 459,5 mıllıard teńge qajet. Sonyń ishinde 2019 jylda 90,7 mıllıard teńge bólý kerek», - dedi R.Dálenov Úkimettiń búgingi otyrysynda.

Aıta keteıik, keshe «Nur Otan» partııasynyń XVIII sezinde QR Prezıdenti Nursultan Nazarbaev tómen jalaqy alatyn bıýdjettik sala qyzmetkerleriniń aılyǵyn 30 protsentke kóterýdi tapsyrdy.

QR Bilim jáne ǵylym mınıstri Kúlásh Shámshıdınova bilim salasynda 500 myńǵa tarta adamnyń jalaqysyn kóterýdi kózdeıdi.

Al QR Densaýlyq saqtaý mınıstri Eljan Birtanov 225 myńnan astam medıtsına qyzmetkerleriniń jalaqysy ósedi dep otyr.