Bıýdjetti josparlaýdyń biryńǵaı erejesi ázirlenedi – Qarjy mınıstrligi
Jańa bıýdjet kodeksin ázirleý boıynsha júrgizilip jatqan sharalar sheńberinde mınıstrlik ózi jetekshilik etetin salalardaǵy zańǵa táýeldi aktilerdi qaıta qaraý jumystaryn bastap ketti.
«Qoldanystaǵy bıýdjet kodeksin iske asyrýda mınıstrlikke 50-den astam zańǵa táýeldi normatıvtik-quqyqtyq aktiler bekitilgen. Onyń ishinde 21 akt bıýdjettik josparlaý salasyn retteıdi jáne olardy 11-ge deıin ońtaılandyrý josparlanyp otyr. Bul normalardyń qaıtalanýyn jáne shekten tys retteýin joıady. Oǵan qosa, bıýdjettik josparlaý protsesin retteıtin barlyq erejelerdi qamtıtyn bıýdjettik josparlaýdyń biryńǵaı erejelerin ázirleý josparlanýda. Bul josparlaý protsesin bıýrokratııadan aryltýǵa múmkindik beredi, bylaısha aıtqanda bıýdjettik josparlaý boıynsha «Ústel ústi kitaby» retinde qoldanylady», - dedi vıtse-mınıstr Senatta ótken «Bıýdjet saıasaty modelin reformalaý» dóńgelek ústelinde.
Budan basqa, biryńǵaı bıýdjettik synyptamany qalyptastyrý protsesin ári qaraı avtomattandyrý jáne zattaı normalardy tsıfrlandyrý josparlanýda. Bul qadam bıýdjettik ótinimderdi avtomatty esepteýler negizinde qalyptastyrýǵa múmkindik týdyrady.
Al biryńǵaı bıýdjettik synyptama memlekettik organdardyń strategııalyq maqsattarymen tyǵyz baılanysy turǵysynan qaıta qarastyrylady. Bul «Bir maqsat, bir bıýdjettik baǵdarlama» dep atalatyn ońtaıly júkteýge kóshý bolmaq.
Sondaı-aq bıýdjettik josparlaý protsesinde jekelegen normalardy qoldanýdyń oryndylyǵy da qarastyrylady. Qazirgi ýaqytta ákimshilerge tez arada sheshim qabyldaýǵa múmkindik bermeıtin jáne shekten tys retteýdi qamtıtyn jekelegen aktiler bar. Mınıstrlik bul baǵyttaǵy máselelerdi barlyq múddeli memlekettik organdarmen pysyqtaýda.
«Jańa bıýdjet kodeksi aıasynda qarajatty tolyq paıdalanýdyń jańa tártibin qarastyrý josparlanyp otyr. Eger ákimshi nemese jergilikti atqarýshy organ keıbir shyǵystardy aǵymdaǵy qarjy jylynda ıgere almaıtynyn aldyn ala bilse, osy shyǵystardy kelesi qarjy jylyna aýystyrý úshin Qarjy mınıstrligine ótinish beredi. Atalǵan mehanızmge sáıkes, ákimshiler qarjyny 1 qańtardan bastap bastap ıgere alady. Biraq, jappaı barlyq shyǵystarǵa ruqsat berilmeıdi, tek obektıvti sebepter negizinde ǵana qarastyrylady. Bul bıýdjet qarajatyn tıimdi paıdalanýǵa kóshýge baǵyttalǵan qadamdardyń biri bolmaq. Qazirgi ýaqytta bıýdjet kodeksine sáıkes, Astana qalasynan basqa jergilikti ınvestıtsııalyq jobalar qunynyń qymbattaýyn qarjylandyrý ákimdikterdiń tikeleı mindeti bolyp sanalady», - dep túsindirdi D. Temirbekov.
Jalpy ınvestıtsııalyq jobalar qunynyń qymbattaýy óńirlerdiń bıýdjetteri úshin aýyrtpashylyq túsiredi.
Bul máseleni sheshý úshin mınıstrlikpen taldaý júrgizilip jatyr.
Bıýdjet kodeksin daıyndaý sheńberinde taldaý qorytyndysyn eskere otyryp, qandaı jobalardy respýblıkalyq bıýdjet jáne qaısysyn jergilikti bıýdjetter qarjylandyratyny týraly krıterııler ázirlenbek.