Bıýdjetti ıgere almaǵandarǵa shara qoldanamyz – Asqar Mamın

NUR-SULTAN. QazAqparat – Bıýdjet qarajatyn ıgere almaǵan mınıstrlikter men ákimdikterge tıisti shara qabyldanady. Bul týraly búgin Úkimet otyrysynda Premer-Mınıstr Asqar Mamın aıtty, dep habarlaıdy QazAqparat tilshisi.

«Byltyrǵy jylǵy, sondaı-aq bıylǵy jyldyń josparyna qaraǵanda asyra oryndaý oryn aldy. Alaıda bıýdjettik baǵdarlamalardyń birqatar ákimshileri bıýdjet qarajat ıgermegen. Qarajattyń eń kóp somasyn ıgermegen Іshki ister mınıstrligi. Onda – 9 mlrd teńge», - dedi Úkimet basshysy.

Osy oraıda Asqar Mamın Іshki ister mınıstri Erlan Turǵymbaevtan munyń sebebin surady.

«Bıýdjet qarajatyn ıgermeýdiń negizgi sebebi 3,5 mlrd teńgege QR Qarjy mınıstrligi Memlekettik satyp alýlar komıtetinde arnaıy tehnıkalardy jetkizýge konkýrs boldy. Olar - 39 avtosaty men 40 avtotsısterna. Olardyń barlyǵy Semeı avtomobıl qurastyrý zaýytynyn shyǵarylady. Búgingi kúni jetkizýge úlgermeı jatyr. 1 qazanǵa deıin bitiredi. 2,6 mlrd teńge áskerı bólimshelerge qatty-suıyq otyn jetkizýge bólingen. Otyn jetkizý búkil Qazaqstan aýmaǵynda júrgizilip jatyr. Qyrkúıektiń sońyna deıin bul qarajat ıgeriledi», - degen mınıstr qalǵan qarajattardyń da jyl sońyna deıin tolyq jumsalatyndyǵyna sendirdi.

Premer-Mınıstr dereginshe, elimizdiń Qorǵanys mınıstrligi de 10,3 mlrd teńgeni ıgere almaı otyr. Osy máselege qatysty sóz alǵan Qorǵanys mınıstriniń orynbasary Músilim Altynbaev 9 aıdyń qorytyndysynda qarajat 99 paıyzǵa ıgeriletindigin aıtty.

Sonymen qatar, Ekologııa, geologııa jáne tabıǵı resýrstar mınıstrligi de 10 mlrd teńge ıgere almaı otyr. Bul máselege qatysty sóz alǵan mınıstr Maǵzum Myrzaǵalıev jyl sońyna deıin qarjyny 100 paıyz ıgermek. Al Mádenıet jáne sport mınıstrligi ıgere almaǵan qarajat somasy - 6,7 mlrd teńge.

«9 aıdyń qorytyndysy boıynsha ıgerilmegen 7 mlrd 262 mln teńge qarajatty tolyq ıgeremiz», - dedi QR Mádenıet jáne sport vıtse-mınıstri Nurqısa Dáýeshov.

Indýstrııa jáne ınfraqurylymdyq damý mınıstrligi de 4,9 mlrd teńgeni ıgere almaı otyr. Atalǵan vedomstvo basshysy Roman Sklıardyń aıtýynsha, bul soma Arystaǵy jarylys saldaryn joıý aktileriniń kesh tapsyrylýyna baılanysty qalyptasqan.

«Jyldyń sońyna deıin sanaýly aılar qaldy. Memlekettik organdar men óńirlerdiń basshylary bıýdjet qarajatyn ýaqtyly ıgerýdi erekshe nazarǵa alýy kerek. Osy rette 9 aıdyń qorytyndysy boıynsha bıýdjet qarajatyn ıgermegen memlekettik organdar men ákimdikterge qatysty tıis sheshimder qabyldanady», - dep eskertti Asqar Mamın.