Bıýdjetten únemdelgen qarajattyń jartysy jol jóndeýge baǵyttaldy - Qostanaı oblysy

QOSTANAI. QazAqparat - Qostanaı oblysynyń bıýdjetinen únemdelgen 2 mlrd teńge birinshi kezektegi qajettilikterge jumsalady. Bul týraly oblystyq máslıhat sessııasynyń otyrysynda málim etildi, dep habarlaıdy QazAqparat tilshisi.

Ekonomıka jáne bıýdjettik josparlaý basqarmasynyń basshysy mindetin atqarýshy Baqytbek Esenǵulov baıandaǵandaı, únemdelgen qarajattyń kóbi jol jóndeýge bólinedi.

«Artylyp qalǵan qarjynyń 947 mln teńgesi oblystyq jáne aýdandyq mańyzy bar joldarǵa baǵyttalady. Atap aıtqanda, Amangeldi aýdanyndaǵy Amangeldi-Úrpek-Rahmet-Álibı (0-16 shaqyrym), oblystyq mańyzdaǵy Rýdnyı-Kachar-Fedorov (50-65 shaqyrym) tas joly, Sarykól aýdanyndaǵy Taǵyl-Qoskól (0-35 shaqyrym) baǵyty, Uzynkól aýdanynyń kireberis joly (0-3 shaqyrym), Altynsarın aýdanyndaǵy Dokýchaev aýyly(0-9 shaqyrym) Fedorov-Pervomaı (0-34 shaqyrym) tasjoly bar. Qarjynyń jetpeı qalǵan bóligi respýblıkalyq bıýdjetten alynady», - dep habarlady B. Esenǵulov.

Aıta keteıik, joǵaryda kórsetilgen joldardyń kóbi 30 jyldan astam ýaqyt jóndeý kórmegen.

Buǵan qosa, únemdelgen qarajattyń 460 mln teńgesi bilim basqarmasyna beriledi. Onyń 250 mln teńgesine kitaptar satyp alynady. Al 210 mln teńge mektepterdi keń jolaqty ǵalamtor júıesine qosýǵa qarastyryldy.  Jalpy, oblystaǵy 514 mekteptiń 224-niń ınternetke shyǵatyn múmkindikteri bar.

Al «Áýejaı» shaǵynaýdanynda salynatyn Ulttyq-mádenı ortalyqty jaraqtandyrý úshin 400 mln teńge bólindi. Sonymen qatar, únemdelgen qarajat sport basqarmasy men oblystyq ІІD qajettilikterine de jumsalmaq.