«Bıýdjetke qatysý»: Almatylyqtardyń usynysymen qandaı jobalar iske asyryldy
«Bıýdjetke qatysý» - bul ózara is-qımyl tetigi. Munda almatylyqtar bıýdjet qarajaty esebinen aýla alańdaryn jaqsartyp, jańa gúlzarlar nemese trotýarlar salýǵa usynys jasaı alady.
Turǵyndar aýdannyń, kósheniń, aýlanyń kelbetin jaqsartýǵa óz úlesterin qosa alady. Ol úshin ótinimdi osy jyldyń 20 qazanyna deıin budget.open-almaty.kz saıtynda qaldyrý qajet. Saraptama komıssııasy smetany jáne ózge de qujattamany daıyndaý máselelerinde járdem kórsetedi. Qandaı ıdeıalar iske asyrylatyny týraly sheshimdi osy aýdannyń aýmaǵynda turatyn qala turǵyndarynyń ózderi qabyldaıdy. Bıyl árbir aýdanǵa 800 mln teńge bólindi. Bir jobanyń somasy 55,5 mln teńgeden aspaýy tıis.
Jalpy, osy jobanyń arqasynda qala turǵyndary «shetsiz qala» qaǵıdasyna sáıkes turǵylyqty jerine qaramastan jalpy paıdalaný oryndaryn jaqsartyp, demalys pen bos ýaqytty ótkizý úshin qolaıly jaǵdaılardy qamtamasyz ete alady.
Baspasóz týry barysynda paıdalanýǵa berilgen nysandar nemese iske asyrýdyń sońǵy satysynda turǵan jobalar tanystyryldy. Týrǵa qatysýshylar negizinen qalaǵa keıinnen qosylǵan tórt aýdandaǵy abattandyrylǵan saıabaqtarǵa, balalardyń oıyn jáne sport alańdaryna bardy.
Atap aıtqanda, Túrksib aýdanyndaǵy balalardyń oıyn alańyn, Jetisý aýdany Aınabulaq-1 shaǵynaýdanyndaǵy saıabaqty, Naýryzbaı aýdanyndaǵy basketbol, fýtbol jáne Workout alańdaryn, Medeý aýdanynyń Samal-1 shaǵynaýdanynyndaǵy saıabaqty aralap kórdi.
Odan bólek, olar Naýryzbaı aýdanyndaǵy Qalqaman-2 shaǵynaýdanyna baryp, onda basketbol, fýtbol jáne Workout alańdaryn aralady. Bul aýmaqta shaǵyn arhıtektýralyq formalar ornatylyp, rezeńke tósemder salyndy. Naýryzbaı aýdany turǵyndarynyń bastamasymen 7 joba iske asyryldy. Olardyń kóbi irgeles aýlalardy, saıabaqtardy abattandyrýǵa, balalar jáne sport alańdaryn ornatýǵa qatysty.
«Bıyl Naýryzbaı aýdanynda «Bıýdjetke qatysý» jobasynyń aıasynda 6 balalar, sporttyq alańdar salyndy. Qalqaman-2 shaǵynaýdanynda úsh nysan: skeıtbord, basketbol alańy, Workout aımaǵy bar. Jobanyń aıasynda kógaldandyrý, aýmaqty jaryqtandyrý qarastyrylǵan», - dedi Naýryzbaı aýdany ákimi apparatynyń abattandyrý bóliminiń bas mamany Ońalbek Qydyrbaev.
Odan keıin baspasóz týrynyń qatysýshylaryna Jetisý aýdany Aınabulaq-1 shaǵynaýdanyndaǵy gúlzar tanystyryldy. Búginde mundaǵy jumystar aıaqtalǵan. Aýmaǵy 2400 sharshy metr bolatyn saıabaq aýmaǵynda rezeńke jamylǵy, asfalt tóselgen.
Oryndyqtar, ýrnalar ornatylǵan, 2 workout alańy bar.
«Bul – shóp basyp ketken, bos jatqan jer bolatyn. «Bıýdjetke qatysý» jobasynyń aıasynda atalǵan jobany turǵyndarmen birlesip jasap, olardan usynystar qabyldandy. Bul aýmaqta turǵyndar úshin barlyǵy qarastyrylǵan», - dedi Jetisý aýdany ákimi apparatynyń abattandyrý bóliminiń bas mamany Ernar Batyrov.
Baspasóz týryna qatysýshylar Túrksib aýdany, Bekmahanov kóshesi boıyndaǵy Spasskaıa kóshesiniń buryshyndaǵy balalar oıyn alańynyń aǵymdaǵy jóndeý jumystarymen de tanysty. Onyń janynda fýtbol alańy bar. Alań oıyn jabdyqtarymen, shaǵyn sáýlet formalarymen jabdyqtalǵan. Jaryq tartylǵan, oryndyqtar men ýrnalar bar. Alańdar 11 kóppáterli jáne 80-nen astam jeke turǵyn úıge jaqyn ornalasqan.
«Bul jerde, kórip otyrǵandaryńyzdaı, balalar alańynyń jóndeý jumystary boıynsha jumystar jalǵastyryldy. Jumysty aýdannyń merdiger uıymdary júrgizdi, ol jumystar mamyr aıynda bastalyp, shildede aıaqtaldy. Sodan beri turǵyndar osy alańdy paıdalanýda. Jalpy, 2019-2020 jyldarǵa arnalǵan «Bıýdjetke qatysý» jobasynyń aıasynda Túrksib aýdanynda bes joba júzege asyryldy», - dedi Túrksib aýdany ákimi apparatynyń abattandyrý bólimi basshysynyń mindetin atqarýshy Raıhan Nurpeıisova.
Sondaı-aq Medeý aýdany Samal-1 shaǵynaýdanyndaǵy saıabaqty abattandyrý jobasy tanystyryldy. Munda jóndeý jumystary áli de júrgizilýde. Saıabaq aýmaǵyndaǵy qoǵamdyq keńistikti jaılastyrýmen birge jasyl aımaqty damytý jáne jalpy qalalyq ortany jaqsartý kózdelgen. Saıabaqta sport alańy paıda bolady, oryndyqtar men ýrnalar ornatylady. Jaryqpen qamtamasyz etý úshin kabel tóseledi, 15 jaryqtandyrý tiregimen jabdyqtalǵan. Gazon tóselip, 30 túp kóshet jáne 50 buta otyrǵyzylǵan.
«Bul jobanyń avtorlary osy shaǵyn aýdannyń turǵyndary. Jobany komıssııa maquldap, basqa turǵyndar da qoldady. Joldasbekov kóshesiniń boıynda balalar alańdary jetkilikti bolatyn, alaıda úlkenderge, sonyń ishinde qart adamdarǵa arnalǵan sport alańdary joq bolatyn», - dedi Medeý aýdany ákimi apparatynyń abattandyrý bóliminiń basshysy Maqsut Nurǵalıev.