Bıýdjet shyǵyny men munaıdan tys kiris arasynda alshaqtyq bar – UB esebi

NUR-SULTAN. QazAqparat – Qazaqstan Ulttyq banki qarjylyq turaqtylyqtyń negizgi táýekelderi men faktorlaryn keshendi taldaý jáne baǵalaý nátıjeleri turǵysynda 2021 jylǵy qarjylyq turaqtylyq týraly esebin jarııalady, dep habarlaıdy QazAqparat tilshisi.

Usynylǵan esepke qaraǵanda, 2021 jyly karantındik shekteýlerdi jeńildetý – iskerlik belsendiliktiń ósýine yqpal etip, onyń ekonomıkalyq ósý perspektıvalaryna da oń áseri boldy. Degenmen, ónimdi jetkizý tizbeginiń tolyq qalpyna kelmeýi jáne energııa jetkizýshiler baǵasynyń joǵary bolýy ınflıatsııalyq qysymnyń kúsheıýine alyp keldi. Sonyń áserinen ekonomıkasy damyǵan elderde aqsha-kredıt saıasatynyń kúsheıýi, memlekettik qaryz deńgeıiniń ósýi jáne bıýdjet tapshylyǵy jahandyq syn-qaterlerge aınaldy.

«Fıskaldyq saıasat úshin negizgi táýekel faktory memlekettik qarjynyń teńgerimsizdigi bolyp qala beredi. Bul bıýdjet shyǵystary men munaıdan tys kirister arasynda saqtalyp otyrǵan tym joǵary alshaqtyqtan kórinip otyr. 2014 jyldyń aıaǵynda munaı baǵasynyń tómendeýi munaı sektorynan túsetin qosymsha ústeme tabystyń jınaqtalýyna tusaý saldy. Bul, óz kezeginde, uzaq ýaqyttan beri Úkimet qolyndaǵy taza aktıvterdiń tómendeýine alyp keldi. 2021 jyldyń sońyna qaraı taza aktıvter JІÓ-ge qatysty eń tómengi mánderine jetti», - delingen Ulttyq bank málimetinde.

Bul turǵyda esepte memlekettik qarjynyń teńgerimdiligi men ornyqtylyǵyn arttyrý maqsatynda Bıýdjet kodeksine engizilgen fıskaldyq erejelerdi saqtaý mańyzdy ekeni aıtylǵan. Olar Ulttyq qor aktıvteriniń saqtalýyn qamtamasyz etedi jáne bıýdjet shyǵystarynyń shamadan tys ósýin tejeıdi.

Sonymen birge 2021 jyly qarjy uıymdarynyń nesıelik qyzmeti COVID-19-dan keıin ekonomıkalyq ósýdiń qalpyna kelýi aıasynda qarqyn ala tústi. Bankterdegi nesıe portfeliniń ósimi 27,9 paıyzǵa, ıaǵnı jeke tulǵalarǵa (40,9%) jáne ShOB sýbektilerine (29,2%) jańa nesıe berý esebinen qamtamasyz etildi. Bankterdegi nesıe portfeliniń sapasy korporatıvtik ári bólshek portfelde aıtarlyqtaı jaqsardy.

«2021 jyly depozıtterdiń dollarlaný deńgeıi 2020 jylǵy deńgeımen salystyrǵanda 39-dan 37 paıyzǵa tómendedi. Bul protsess bıyl da jalǵasty (mamyrda – 33%)», - dep atalyp ótken UB habarlamasynda.

Ulttyq bank saıtynda atalǵan esep málimetterimen tolyq tanysýǵa bolady. https://nationalbank.kz/kz/news/otchet-o-finansovoy-stabilnosti/rubrics/1815