Bıýdjet shyǵyndarynyń basym bóligi áleýmettik salaǵa tıesili – Erjan Birjanov
Eske sala ketsek, Parlament Májilisinde «2023-2025 jyldarǵa arnalǵan respýblıkalyq bıýdjet týraly» zań jobasy qaraldy.
Erjan Birjanovtyń aıtýynsha, bıýdjet tapshylyǵy bıyl jalpy ishki ónimge 3,3%-dan 2025 jylǵa deıin 2,5%-ǵa deıin tómendeıdi dep josparlanyp otyr. Shyǵystar bıylǵy josparǵa qaraǵanda 2,2 trln teńgege ulǵaıyp, 2023 jyly 21 trln teńge bolady.
«Úsh jyldyq kezeńge arnalǵan respýblıkalyq bıýdjet jobasy shyǵystarynyń qurylymy ózgerdi. Bul barlyq aǵymdaǵy nysanaly transfertterdi jergilikti bıýdjetter bazasyna berýge baılanysty. Bul rette burynǵydaı bıýdjet shyǵystarynyń basym bóligi áleýmettik salaǵa tıesili bolyp otyr», - dedi Qarjy mınıstriniń mindetin atqarýshy Májilistiń jalpy otyrysynda.
2023 jyly áleýmettik salaǵa bıylǵy josparǵa 2 trln teńgege ulǵaıta otyryp, 10,6 trln teńge bólý kózdelgen.
«Shyǵystardyń ósýi jyl saıynǵy ındeksatsııalaýmen jáne zeınetaqy men járdemaqy alýshylar kontıngentiniń ulǵaıýyna; pedagogterdiń, dárigerlerdiń, medıtsınalyq emes qyzmetkerlerdiń jáne azamattyq qyzmetshilerdiń jalaqysyn arttyrýǵa; «Jaıly mektep» ulttyq jobasyn júzege asyrýǵa baılanysty», - dedi Erjan Birjanov.
Sonymen birge, 2023 jylǵa ekonomıkanyń naqty sektoryn qoldaý úshin bıýdjet shyǵystary 2,5 trln teńge somasynda josparlanǵan.
«Bul baǵyttyń basymdyqtary: óńdeý ónerkásibin damytý; óńirlerde jalǵasatyn ınfraqurylymdyq jobalardy iske asyrý; kásipkerlikti, shaǵyn jáne orta bıznesti damytý jáne qoldaý; kólik jáne gaz tasymaldaý júıesin damytý bolmaq. Kúsh qurylymdarynyń shyǵystary 2023 jylǵa 2,3 trln teńge kólemde josparlanyp otyr», - dedi spıker.
Buǵan deıin E. Birjanov respýblıkalyq bıýdjetke munaı túsimderi birtindep azaıatynyn, munaı emes túsimder úlesi 2025 jylǵa qaraı 78,2% deıin ósetinin aıtqan edi.