Bıýdjet shyǵynynyń jartysy Ulttyq qordan jáne qaryzǵa alynyp jatyr — Smaıylov

<p>ASTANA. KAZINFORM — Parlament palatalarynyń birlesken otyrysynda Joǵary aýdıtorlyq palata tóraǵasy Álıhan Smaıylov Úkimettiń bıýdjet qalyptastyrý kezinde jiberetin kemshilikterine toqtaldy.</p>

«Basty problema — bıýdjettiń turaqty tapshylyǵy. Sońǵy jyldary shyǵystar edáýir ósip keledi. Bul rette munaıǵa qatysty emes kirister shyǵystardyń 50%-ǵa jýyǵyn qamtamasyz etip otyr. Qalǵan bóligi negizinen Ulttyq qordyń transfertteri jáne qaryz tartý esebinen óteledi. Sondyqtan tapshylyqty ustap turý jetkiliksiz. Ol úshin tapshylyǵy joq bıýdjetti qalyptastyratyn uzaqmerzimdi jospar qajet», — dedi ol.

Sondaı-aq, ol Ulttyq qordy basqarýdyń normatıvtik quqyqtyq bazasy turaqtandyrý kerektigin aıtty.

«Olaı bolmaǵan jaǵdaıda Memleket basshysynyń Ulttyq qordyń valıýtalyq aktıvterin 2030 jylǵa qaraı 100 mlrd dollarǵa deıin ulǵaıtý jónindegi maqsatyna qol jetkizbeý táýekeli joǵary ekenin kórip otyrmyz. Qaryz alý quralyn keńinen qoldaný da borysh júktemesiniń táýekelin arttyrady. Qazirdiń ózinde boryshty óteý jáne qyzmet kórsetý shyǵystary bıýdjettiń barlyq túsimderiniń 17%-dan astamyn quraıdy», — dedi bas aýdıtor.