Bıýdjet protsesinde óńirlerdiń jaýapkershiligi kúsheıedi – Qarjy mınıstri

NUR-SULTAN. QazAqparat – Jergilikti jerde salyq bazasyn kemitip kórsetý faktilerine qatysty Esep komıtetiniń eskertýi oryndy. Bul týraly Senattyń jalpy otyrysynda 2021 jylǵy respýblıkalyq bıýdjettiń atqarylýy týraly esepti qaraý kezinde Premer-Mınıstrdiń orynbasary – Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Biz Esep komıtetiniń respýblıkalyq jáne jergilikti bıýdjetter arasyndaǵy qarjy aǵyndaryn barynsha azaıtý jónindegi usynysymen kelisemiz. Óńirlerdiń bıýdjet derbestigin nyǵaıtý úshin qosymsha salyq túsimderin óńirlerge berý jolymen bıýdjetaralyq qatynastardy jetildirý júzege asyrylatyn bolady», - dedi E. Jamaýbaev.

Onyń aıtýynsha, bıýdjet protsesinde óńirlerdiń jaýapkershiligi kúsheıtilmek.

«Jalpy sıpattaǵy transfertterdi kóbirek alý úshin jergilikti jerde salyq bazasyn kemitip kórsetý faktilerine qatysty Esep komıtetiniń eskertýin oryndy dep sanaımyz. Sol sebepti bıýdjet protsesinde óńirlerdiń jaýapkershiligin arttyrýǵa erekshe kóńil bólinetin bolady», - dedi Premer-Mınıstrdiń orynbasary.

Budan buryn habarlanǵandaı, E. Jamaýbaev byltyr memleket óziniń áleýmettik mindettemelerin tolyq kólemde oryndaǵanyn aıtty.