Bıýdjet qyzmetkerleri jalaqysy men járdemaqydan únemdeýge bolmaıdy - Toqaev
«Jylytý maýsymyn minsiz ótkizý — ózekti máselelerdiń biri. Bul meniń erekshe baqylaýymda. Saran qalasy aýa-raıynyń sýytýyna daıyn bolmaı shyqty. Mundaǵy úıler jaqynda ǵana jylý júıesine qosylǵan edi. Kemshilikke jol bergen jaýapty tulǵalar tıisti jazasyn aldy. Bul barlyq ákimge sabaq bolýy kerek. Jylytý maýsymyna daıyn bolmaý basshylardyń óz qyzmetine saı kelmeıtinin kórsetedi. Degenmen bıyl el aýmaǵynda energııa kózderi men jylýmen jabdyqtaý jelilerin jóndeý boıynsha aýqymdy jumys júrgizildi. Qoımalardaǵy otyn qory jetkilikti. Biraq qamsyz otyrýǵa bolmaıdy. Jaǵdaıdy udaıy baqylaýda ustaý kerek», — dedi Qasym-Jomar Toqaev.
Prezıdent memlekettik basqarý júıesiniń aldynda qazir naqty mindetter men edáýir syn-qater turǵanyn basa aıtty.
«Oqys oqıǵalarǵa der kezinde ún qatý, jaǵdaıdy ýshyqtyrmaý, dál boljam jasaý, qoǵamnyń talap-tilegine qulaq asý mańyzdy. Barlyq memlekettik organ, kommýnaldyq jáne basqa da qyzmetter úılesimdi áreket etýi kerek. Alaıda, kúndelikti sharýamen aınalysyp júrip, strategııalyq maqsattardy umyt qaldyrmaý qajet. Alǵa qaraı umtylyp, keń aýqymdy perspektıvany baǵyt etkenimiz jón. Problemanyń ýaqytsha sheshimin izdemeı, onyń túpki sebepterin joıýymyz qajet», — dedi Prezıdent.
Qasym-Jomart Toqaev Joldaýynda bıýdjet qarjysyn tıimdi paıdalanýǵa baǵyttalǵan sharalar qabyldaýdy tapsyrǵanyn atap ótti.
«Álbette, bıýdjet saıasatynda pragmatızm qaǵıdaty basty orynda bolýy kerek. Biraq áleýmettik shyǵyndardan, bıýdjettik mekeme qyzmetkerleriniń jalaqysynan, zeınetaqy men járdemaqydan únemdeýge bolmaıdy. Bul — meniń berik ustanymym. Azamattardyń ál-aýqatyn arttyrý jónindegi basym mindetti udaıy nazarda ustaǵan durys. Zeınetaqy júıesiniń áleýetin arttyrýdyń, ony jetildirýdiń tásilderin tabý kerek. Deni saý, qajyr-qaıraty mol zeınetkerlerdiń el damýyna qosyp júrgen úlesin yntalandyrý mańyzdy. Ortasha ómir súrý jasyn birtindep ulǵaıtý — memlekettiń áleýmettik saıasatynyń basty jetistikteriniń biri. Bul kórsetkish qazirdiń ózinde 75 jastan asty. Osy turǵydan alǵanda atalǵan másele ózekti bola túsedi», — dedi Qasym-Jomart Toqaev.